Rio Olympic-ah Indian shuttler 7

Badminton World Federation chuan May 5, Ningani hian Rio Olympic a inlan thei tur badminton player a puang dawn. World ranking aṭanga teh tur a nih avangin Indian Shuttler pasarih zet chu Rio Olympic-ah an inlan thei dawn tih a chiang.

Rio Olympic-a in-lan thei tur chin tehna hnu-hnung ber chu Pathiannia khelh zawh tak Badminton Asia Championship kha a ni a, Indian shuttler-ten champion nomawi chawi lo mah se hmeichhe player pali Saina Nehwal, PV Sindhu, Jwala Gutta leh Ashwini Ponnappa bakah mipa player Kidambi Srikanth, Manu Attri leh Sumeeth Reddy te chu infiamna khawmpui liana inlan thei turin an dinhmun a ṭha tawk.

India hian a vawi khat nan women single-ah player pahnih a nei dawn a, world number 8 Saina leh world number 10 Sindhu te chu medal dawng thei tura beisei an ni. Olympic-ah hian single-ah ram pakhatin player pahnih an nei thei a, mah se ram aiawh turte chu world ranking-ah a sang 16 zinga an tel a ṭul thung.

National team Coach Pullela Gopichand chuan inbuatsaihna ṭha a pawi-mawh thu sawiin, "Rio Olympic-a inlan thei tura inbuatsaihna hun chu a zo tawh a, tunah chuan chawlh kar riat chhung vel inbuatsaihna hun kan nei dawn. He hun ṭha kan neih hi ka chhawr ṭangkai theih a nih chuan medal tam zawk kan lak theih ngei ka beisei," tiin a sawi.

Kum 2012 London Olympic-ah khan Indian shuttler panga an lo inlan tawh a, Saina-i'n bronze medal dawngin India tana badminton-a medal dawng thei hmasa ber leh awmchhun a la ni.