Inkhel turin ka inpeih - Sindhu

PV Sindhu chuan a taksa a fit tawk tawh thu a sawi a, tunah chuan tournament khel tura a inpeih thu a sawi. Tun season chhung erawh chuan hri leng vangin inelna hmachhawn tur a awm tawh lo ang.

Rio Olympic silver medalist hian tun hnaiah beisei a phak lo, India rama training mai duh tawk loin England lamah a kal hial. UK-ah hian ngawrh takin training a nei a, hun rei lote chhungin hmasawnna a chhar niin a hriat.

World champion Sindhu chuan, "Hri leng vangin mahni inenkawl leh inven reng a ngai, chumi karah chuan kalphung pangngaia training neih chu a awlsam lo hle. Tunah erawh ka fit ṭha leh tawh a, hmalam hun pawh a eng zawngin ka thlir leh thei tawh.

"Training-na hmun mai bakah ka chenna inah ka insawizawi reng bawk a, chu chuan rah ṭha a chhuah niin ka hria," a ti. Sindhu hian nakkum nipui laia neih tur Tokyo Olympic chu a hmathlir lian a nih thu a sawi bawk.