Semifinal-ah Nadal a chak lo

Rafael Nadal chu Paris Masters semifinal-ah a chak lo, world number 2 hi German tlangval Alexander Zverev lakah 6-4, 7-5 a tlawmin nomawi chawi a beiseina a chu a tawp.

Inrinni zan inkhelah Nadal a che fuh lo hmasa zawk, a service hloh vangin set khatna a hloh. Set hnihnaah pawh a service a hloh leh a, mahse chhuhsak let velin 3-3 a nih pui. Amaherawhchu 5-4 a hma a hruai hnuah Zverev-a'n a pawtthla leh a ni.

Seeded palina Zverev-a'n hnehna chang turin darkar khat leh minute 39 a mamawh, tun hma an intawn hmasak pangaah Nadal hi a ngam lo vek mah se tun hnaiah erawh a zawnin vawi hnih a hneh ve ta.

Spanish tlangval Nadal hian Paris Masters title hi a la chawi ngai lo, 2007 khan final lut ve tawh mah se David Nalbandian a ngam lo. French Open ang bawkin Paris khawpuia inelna neih ni mah se hard court a nih avangin a inkhelh thiamna hmun a ni lem lo.

Semifinal inkhel dangah seeded pathumna Daniil Medvedev chuan darkar khat leh minute 37 chhungin Canadian tlangval Milos Raonic chu 6-4, 7-6 (7-4) in a hneh. Nizan khan final khelh zui niin he thu buatsaih lai hian result kan hre hman lo a ni.