Europa League Tho leh tura intiam Jurgen Klopp
Liverpool-in an league match hnuhnung berah mualpho takin Swansea City chu 3-1 in an hneh lo a, Reds manager Jurgen Klopp-a'n Europa League semifinal second leg an khelh hunah an thawh leh nghal tur thu a sawi a, zaninah German manager thusawi dik leh dik loh a lang chhuak dawn.
Zanin dar 12:35 hian Anfield-ah Villarreal an leng lut dawn a, first leg-a 1-0 a hnehna lo chang tawh Villarreal tan an club history ziak danglam turin goal chhuah loh a tawk - Villarreal hian an club chanchinah Europe inelnaah final an la lut ngai lo.
Hetihlai hian Ukraine-a Shakhtar Donetsk nena 2-2 a inhnehtawk tawh champion lai Sevilla chuan semifinal second leg khel tur hian zan dar 12:35-ah vek Ukrainian club hi an mikhual dawn a, season thum chhung a zawna final lut turin an dinhmun a ṭha hle.
Reds vs Yellow Submarine
Liverpool-in an match hnu-hnung pangaah vawi hnih chiah hnehna changin Newcastle United nen an inhnehtawk hnuah an la tho leh lo. Zanina an hmachhawn tur Villarreal laka an tlawm hnuah Swansea City lakah 3-1 in an tlawm chhun-zawm a, Reds fan-te ngaih ti ṭha tur erawh Welsh club an hmachhawn ṭumin player naupang rual an chhawr.
Villarreal-in an match hnu-hnung pangaah vawi hnih hnehna changin vawi khat an khingpui an inhnehtawkpui a, vawi hnih a tlawm zawkah an ṭang thung. An match hnuhnung panga chauh thlirin team pahnih hi intluk tawh viau angin lang mah se Villarreal chak hi an match hnuhnung pahnihah a ni a, Liverpool an hneh hnuah Valencia 2-0 a hneh lehin season tharah Champions League an khel dawn chiang tawh - an phur vanglai tak a ni.
Team Dinhmun
Europa League bikah Villar-real-in an match hnuhnung 12-ah hneh loh an tawng tawh lo a, Liverpool tan Spanish club hi awlsam taka hneh chi niin an lang lo.
Hetihrual hian Reds hi Euro-pa League aṭanga thai bo ngawt tur chuan an uiawm - Villarreal laka an tlawm tih loh kha chu tun season Europa League-ah an la tlawm miah lo. Hei mai a ni lo, tun season-a Anfield-a Europa League match ruk an khelh tawhah goal an la khung vek a, an la tlawm miah lo bawk.
Tute nge khel dawn?
Reds-in hliam vangin Di-vock Origi leh Emre Can-te an la chhawr thei dawn lo a, rei tak chhung hliam vanga chawl tawh Danny Ings chuan training zawm tawh mah se a la inlan theih a beiseiawm loh.
Villarreal tan Liverpool nen an inhmachhawn hmasak ṭuma inhliam Eric Bailly leh kum 23-a upa striker Leo Baptistao-te chuan training an zawm leh tawh a, chhawr theih an nih dawn leh dawn loh la chiang lo mah se Europa League match 12-a inlana goal kua khung tawh Cédric Bakambu an neih miau avangin Spanish club hi tlarhma lamah an buai hran lo ang.
Sevilla an ṭang
Ukraine-ah Sevilla-in away goal hnih hlu tak an khung a, Spanish club goal hmahruai khungtu Vitolo chuan kum thum chhung a zawna Europa League nomawi chawi ngei an tum thu a sawi.
Spanish winger chuan, "Shakhtar Donetsk kan mikhual tur hi a pawimawh zia chu kan fan-ten an hria a ni. Hmarik ham a nih rualin theihtawp kan chhuah ang a, final lut ngei turin kan theihna zawng zawng nen kan bei ang," tiin tih mai mai an tum loh thu a sawi.
Sevilla hian an khelmuala Europa League match an khelh hnuhnung 12-ah vawi 11 hnehna an chang thei a, an khelmualah tawh an khirh dawn. Shakhtar erawh chuti maia zam tur chi an ni bik lo.
Ukrainian club hian an match hnuhnung pathuma an khingpui an inhnehtawkpui vek hnuah league hmahruaitu Dynamo Kiev chu Pathianni khan 3-0 in an sawp a, an phur vanglai tak a ni.
Shakhtar striker Facundo Ferreyra chuan, "Sevilla buaina ṭhin chu counter-attack a ni a, an chak lohna leh panna lai hre ran chung hian kan khel ang," tiin counter-attacking football an khelh tur thu a sawi.