Leicester City champion Infiamna khawvelah a aia thawnthu ropui a awm em?

Football khawvelah Premier League-in ngaihven a hlawh chhoh zel avangin Russian sum bawm a hai hawng a, American leh Asian sumdawng hausa-te bank account thlengin a nghawng a, Arab oil mawm luang lutin club-a chawm mawm a, Premier League chanchin chu 'sum ngah ngah hmeṭha' tih a ni.

Mahse, chutianga sum tam tak che vel karah chuan club tenau Leicester City an lo lang nawlh a, Premier League club liante sum sen zahve pawh seng lo chungin league champion an ni a, a hna hnuhnung pangaa ban hlawh manager kaihhruai, non-league club striker ṭhin kha an player pawimawh a nihna club hi khawvel titi tui ber an ni a - 'infiamna khawvela thawnthu ropui ber a ni hial ang' tih chu mi tam tak ngaihdan a ni a, hnial chi lah a ni hek lo.

Leicester manager Claudio Ranieri meuh pawhin khelmuala an thawnthu ziah hi thil mak a ni tih a pha lo a, Italian manager inngaitlawm tak chuan, "Tun aṭanga kum 10 emaw kum 20 chhung chuan club lian thoin Premier League nomawi an chawi ang. Sum tam leh player langsar bawkin nomawi an chawi ang - tun hma chuan hei hi a dikna chu 100% a ni a, tunah erawh 99% a ni thung," tiin a sawifiah thiam hle.

Hmanah chuan...

Leicester City-in league nomawi an chawi hmain infiamna khawvelah thil mak a lo thleng fo tawh a, chung zinga langsar tak chu 1991 US PGA title-a golfer John Daly champion kha a ni. Daly hian US PGA title-a chawi hma hian a nomawi chawina khelmual Crooked Stick course chu a la hmu miah lo a, mi in-hnuh-dawh zara tel ve mai mai gol-fer hi golf inelna khawvela ngaihhlut hlawh ber champion a ni daih!

Tyson tukdawltu

Kum 26 kalta a Tokyo khaw-puia heavyweight title inchuh tura Mike Tyson leh Buster Doug-las an inhmachhawn dawn khan khawvelin ngaihdan a neisa a, chu chu Tyson a chak dawn tih a ni.

Iron Mike Tyson hian vawi 37 inhnek a hmachhawna chak vek record nei chungin ring chhung a lut a, a khingpui 33 knockout tu boxer hmaah hian Douglas a dinchan ringtu an tam lo hle. A chhan maw?

Tyson a ropuina chu dah
ṭha ila, Douglas hi an inhnek hma lawkin dam lohna avangin training a nei hleithei lo a, Tyson nen an inhnek hma kar thumah a nuin a thihsan bawk. Round 7-naa a tluk hnuah round 10-naah Tyson a tlu ve thung a, Douglas angin boxer rothap hi a tho ve thei tawh lo thung - boxing khawvela inhnek ropui an sawi apiangin he inhnek hi sawi hmaih a ni ngai lo.

Khawvel hmaah Boris Becker

Kum 1985-ah khan Boris Bec-ker chu kum 17 chauha upa a la ni a, a hma lawkah exam pawimawh a neih avangin Wimbledon-ah inlan tura beisei a ni lo. Mahse, unseeded player nichungin Becker a inlan a, men single nomawi nen a haw - exam tur zir loah chuan inchhir lo pawl tak a niin a rinawm.

Tennis-ah hian thawnthu ngaihnawm tak tak sawi tur a awm nual. Swedish tennis star Mats Wilander chuan kum 17 leka upa nichungin French Open a khelh hmasa berah nomawi a lo chawi tawh a, Michael Chang chuan kum 17-a upa a nihin French Open nomawi vek a lo chawi tawh bawk.

Sakawr intlansiak

Kum 1981 khan sakawr intlan-siak ngaihhlut Grand National-ah Bob Champion a inlan a, inelna neih a nih hmain a kap bawr cancer vangin Champion hian chemotherapy vawi tam a lak a ngai hial - mah se, Grand National-ah damkawr Bob umpha an awm lo a, a hming pu zo tak chungin a champion.

Nottingham vanglai

English football chanchin sawi a nih apiangin Nottingham Forest chanchin an sawi hmaih ngai lo. A chhan maw?

January, 1975-a Brian Clough-a'n Nottingham manager hna a chelh ṭan tirh khan English club hi second division league-ah 13-na an ni. Season hnih hnuah khatih laia English league sang ber first division league an khel a, first division an inlan kum hnihnaah league champion an ni a, Europe-a an inlan hnuah European Cup nomawi an chawi chhunzawm a, a kum lehah an nomawi hi an la chawi chhunzawm cheu bawk!

Leicester ropuina

Football-ah bik Euro 2004-ah beisei loh takin Greece an lo champion tawh a, kum 1992 Euro-ah Yugoslavia hrem an nih vang chauha inlan Denmark an champion tawh bawk.

Infiamna khawvela thil thleng ropui tak tak kan ziahte hi sawi nep theih an ni lo - mah se Leicester City thawnthu erawh a ropui ber lawr lak! A chhan maw? Nottingham Forest ai pawhin maw? tih hi zawhna awm thei nghal a ni.

John Daly, Buster Douglas, Boris Becker, Bob Champion-te hlawhtlinna a ropui rualin Leicester City erawh kum tluana match 38 khel an ni a, Nottingham Forest ropuina sawi nep theih a nih loh rualin tun angin English club zingah sumin ro a la rel lo a, club lian tia sawi tur an la tam lo.

Ni a liam ang a, thla a liam ang a, kum tam a liam ang - Leicester City hlawhtlinna erawh infiamna khawvel chanchin ziahna phekah a chuang reng tawh ang a, hlawhtlinna ropui sawi a nih apiangin Ranieri leh a naute chanchin hi sawi hmaih a ni tawh ngai lo ang.