Basketball-ah Mizoram an tla

67th Junior National Basketball Championship aṭangin Mizoram team chu nimin zing khan semifinal-ah Chhattisgarh hneh loin an tla.

Puducherry-a neih mek kum 19 hnuai lam inelnaah hian Mizoram hi Group E-ah awmin Tripura (72-71), Bihar (53-49) leh Himachal Pradesh (66-35) an hneh a, semifinal an lut.

Mizoram hian group stage-ah an khingpuite hneh vek mah se nimin zing khan Group D hmahruaitu Chhattisgarh an hmachhawn a, 65-42 in a chak lo.

Basketball-ah Mizoramin India ram pum huap angin sulhnu ṭha a la nei tawk lo a, tun ṭumah pawh hian Level 2-a dah an ni. Level 1-ah hian India rama basketball thiam state 10 an awm a, Mizoram awmna Level 2-ah hian state 16 an awm thung. Level 1 kai pha turin Mizoram tan Level 2-ah champion nih a ngai a, amaherawhchu final an thlen phak tak loh avangin Level 2-ah an awm chhunzawm zel ang.

Mizoram hian nomawi hawn pha lo mah se team enkawltuten Mizo player zingah Sathyabama University, Tamil Nadu aṭanga sawmna hmu an awm niin Vanglaini palai an hrilh.

MSL2 Relegation Playoff-a Re-public VR4 in an lakluh Prasanna Venkatesh kha Sathyabama chhuak a ni a, lehkha zir paha a inkhelh hnuah Indian Overseas Bank (IOB) zawmin India aiawhin a khelpha chho bawk.