Federation Cup Jeje-a ten Salgaocar mikhual dawn
Zanin dar 7:00-ah Mohun Ba-gan-in Federation Cup quarterfinal second leg khel turin Salgaocar chu an mikhual dawn a, semifinal lut tur a chiang dawn.
Goa-a team pahnih an inhma-chhawn hmasak ṭumin Mizo tlangval Jeje Lalpekhlua a langsar a, Hnahthial tlangval goal hnih thun chhawr ṭangkaiin Kolkata club-in 3-2 in hnehna an chang.
Barasat Stadium-a inkhel turah hian Mohun Bagan-in goal khat chhuahin goal dang khung let lo pawh nise away goal rule-in an chak dawn tho - mahse, Bagan hi club lian an nih avangin chak ngei tumin an khel ang.
Norde-a innghat lo
Mohun Bagan-in Indian football-a hlawh hnem ber nia an sawi Sony Norde an kawl a, mah se Haiti international hi LA Galaxy striker hlui Cornell Glen nen Salgaocar an hmachhawn ṭumin hliam vangin an inlan thei lo.
Bengali coach Sanjoy Sen chuan, "Sony Norde tel lo chuan chak thei lo angin min sawi a, Salgaocar kan hneh
ṭumin ani bakah Cornell Glen pawh a tel lo a, kan chak tho a ni," tiin a star player-te tel lo pawha an ṭhat tawk thu a sawi.
Zaninah player pahnih hi an inlan theih dawn leh dawn loh a la chiang lo. Mahse, Bagan hian FPAI Indian player of the year leh Salgaocar laka goal hnih khungtu Jeje-a an kawl miau a, Sanjoy Sen-a lungphang lo hi a mak hran lo.
Hnathawk ṭha Jeje
Hmanni lawka AIFF-in a ṭawng hnem vanga cheng nuai 10 chawi tura an hrem coach chuan Mizo tlangval Jeje-a chanchin sawi chhunzawmin, "Striker hna chu goal khung a ni. Khawvel khawi hmunah pawh striker ṭhain goal a khung theih loh chuan team an talbuai ṭhin. Jeje erawh goal a khung reng a, amah leh team tan hna ṭha tak a thawk a ni," tiin Mizo tlangval a fak.
Hetihrual hian Bagan coach chuan an fixture a tawt avangin player ngai chhawr reng chi a nih loh thu a sawi a, player chu an taksa lam inpeih dan a zira a chhawr kual tur thu a sawi. Zaninah player an inthlak nual a nih pawn a mak lo ang.
Goan club an buai
Salgaocar-in tun season-ah coach pathum an nei tawh a, Goan club hi an talbuai tih phat rual a ni lo. I league ṭan tirah chak hmel an hmuh theih loh avangin Scottish coach Malky Thomson an ban a, Santosh Kashyap an lakluh hnuah I League-ah inhamtang mah se Royal Wahingdoh boss hlui hi club neitute nen an inhmuh thiam loh avangin a bang. Assistant manager Mario Soares chuan Goan club hi a enkawl mek.
Swansea City striker hlui Darryl Duffy chuan first leg-a Mohun Bagan nen an inkhelh hmain, "Kar 14 chhungin coach pathum kan nei hman a, a dik lo a ni," tiin a lungawi loh thu a sawi a, khelmualah an beisei ang result an hlawh chhuak thei lo bawk. Goan club talbuai vanglai taka hneh theih loh hi Mohun Bagan tan mualphona a nih dawn avangin Kolkata club tan chak loh a thiang lo.