Hremna hmachhawn tur Fellaini leh Huth

Manchester United midfielder Marouane Fellaini leh Leicester de-fender Robert Huth te chu Pathianni zana an inhmachhawn ṭuma an chet dan vangin FA chuan tharum thawhah a puh.

German defender Huth hian Fellaini sam a pawhsak hnuah Belgian midfielder hian a nghawk a, referee-in hmu lo mah se video replay-ah chiang takin a lang.

Player pahnih hian nizan dar 10:30 thleng kha insawifiahna hun pek an ni. FA-in hrem thei tura thutlukna siam tur hian referee hna chelh tawh mi pathumin video hi an en let a ni.

Tharum thawh vanga hremna hi match thum a ni tlangpui a, Spurs midfielder Delle Alli chu tharum thawh vang thoin tun season chhung a inlan thei tawh lo.

Fellaini hi match thum an hrem a nih pawhin FA Cup final-a Crystal Palace an hmachhawn hunah a la inlan thei dawn tho. A chhan chu United hian Premier League-ah match thum khelh tur an la neih vang a ni.

United hian Nor-wich, West Ham leh Bour-nemouth an la hmachhawn dawn a, Premier League champion thar Leicester-in Everton leh Chelsea an la khelhpui ang.