Mirza leh Hingis ten quarterfinal lut

Indian tennis ace Sania Mirza leh a ṭanpuinu Swiss Martina Hingis ten season duhawm tak an hman zawh hnuah kuminah pawh an inkawp fuh leh dawn niin a lang.

Thawhlehni zan khan Taiwan-Croatian pair Chia-Jung Chuang leh Darija Jurak te hnehin Madrid Masters hmeichhe double-ah quarterfinal an inhlangkai. Seeded pakhatna Mirza leh Hinghis te hian munute 53 chhung chauhin 6-0, 6-4 in hnehna an chang thei.

Indo Swiss duo te hi nikum kumtir lam aṭang kan an ṭang dun ṭan a, tun thlengin nomawi 13 an chawi dun tawh. Kumina Grand Slam tournament hmasa ber Australian Open-ah khan champion mah se Miami Masters leh Indian Wells lamah te beisei phak loin second round-ah ve ve an tla a, kar hmasa khan Stuttgart Open final-ah an chak lo bawk.