Stamford Bridge-ah Courtois a hlim

Chelsea goalkeeper Thibaut Courtois chuan Stamford Bridge-ah a hlim thu leh club dang zawm tumna a neih loh thu a sawi chhuak.

Chelsea hian season hmasa khan Premier league nomawi chawi mah se tun season-ah beisei an phak lo hle a, table-ah pakuana dinhmun luahin season tharah Champions League an khel dawn lo.

Europe-a an inlan dawn loh vang hian an player ṭha ṭhenkhat an chhuah duh ringtu an tam a, Petr Cech nekchhuaktu Courtois hi Ligue 1 champion Paris St Germain nena sawi zawm a ni nghe nghe.

Belgian international Cour-tois chuan, "PSG nen hian inbiakna kan la nei lo a, Paris hi club ṭha tak chu an ni ngei mai. Mahse, England-a inkhelh hi nuam ka tiin he hmunah hian ka hlim. Champions League kan khelh dawn loh vangin mi tam takin kan chungah ngaihdan hrang hrang an sawi ṭhin a, he hmunah hian kum thum dang contract ka la neih avangin 100%-in ka nghet," tiin Blues chhuahsan tumna a la neih loh thu a sawi.