Federation Cup. I League champion pet chhuaktu MPL champion

Thawhlehni zan khan Aizawl FC-in Federation Cup champion lai leh I League champion thar Bengaluru FC chu Sree Kanteerava Stadium-ah 3-2 in an hneh. RG Stadium, Mualpuiah 2-1 a an hneh tawh bawk avangin MPL champion hi semifinal lut turin 5-3 in an chak.

Federation Cup-ah Aizawl FC-in an match hmasa berah team ṭha bera ngaih Bengaluru FC an hmachhawn nghal avangin Mizo mipui beisei a sang lo a, RG Stadium-a Blues an mikhual ṭum pawhin entu an tam lo. Amaherawhchu MPL champion hian ṭan tlak an ni tih lantirin I League-a vawi hnih an hneh tawh loh lakah phuba an la a; Thawhlehni tlaia Sporting Goa an mikhual hunah chuan entu tam zawk an pungkhawm tawh ang.

Intham lohna

I League leh FPAI-in coach of the year atana an thlan Ashley Westwood chuan RG Stadium-a an chak loh zawhah vanduai vang chauha chak loah a inngai a, minute 180 khelh tur a nih avangin minute 90 chhunga an chak lohna chu eng thamah mah a ruat lo.

Manchester United youth system chhuak Ashley chuan, "Second leg-ah erawh kan chak ang, away goal rule hman pawh a ṭul lo ang. 100% in semifinal kan lut ang," tiin Mizoram champion hi a ngainep hle.

Bengali coach Jahar Das chu English coach lakah a tlawm duh bik lo a, Aizawl FC boss chuan, "Bengaluru chu inkhelh ṭan tir minute 30 chhung bak an ṭha lo a, chumi hnuah chuan team pangngai an ni," tiin Blues chu dan theih an nih thu a sawi.

Game Plan

Bengaluru FC boss Ashley-a'n sawi lang duh lo mah se player a rem dan aṭangin ni 11 chhunga match li khelh a ṭul avangin a fimkhur tih a lang.

Starting eleven-ah player pathum a siksawi a, hrem vanga Aizawla zin ve lo Keegan Pereira leh I League-a vawi khat chauh inlan Nishu Kumar bakah CK Vineeth-te chu inkhel bul a
ṭantir a, wing back tlan chak Lal-chhuanmawia Fanai leh winger tlan chak Udanta Singh te chu second half-a lut turin a dah ṭha.

Aizawl FC coach Jahar Das pawhin player pakhat a thlak a, Bengaluru khelmuala inlan turin Blues rawlthar Malsawmzuala, Daniel Lalhlimpuia leh Nishu te nena AIFF Academy chhuak Lalramzauva Khiangte chu Brandon VL Remdika aiah bul ṭantir a ni.

Tuesday-ah Sunday

Bengaluru FC goal bawh na nghal mah se Aizawl FC-in goal an khung hmasa.Minute 26-naah Joel Sunday-a'n goal khung thei bik striker a ni tih lantirin Blues right back Nishu chiang taka a bum hnuah a ke veilamin a hlap goal. Aizawl FC-in insiamrem hmain Blues-in Vineeth hmangin minute hnih hnuah an chhang let.

Aizawl FC-in an dinhmun an siamrem leh thuai a, Blues defender John Johnson leh Keegan Pereira te inrinthulh vangin Alfred-a pass mawi tak chu Sunday bawkin Aizawl FC tan a pet goal.

Halftime hmain Bengaluru FC-in an si phurh sut tum viau mah se Eugeneson Lyngdoh-a ball pek chu CK Vineeth-a'n a tauh hman lo a, John Johnson-a'n crossbar tauh perin Aizawl FC keeper Soram Poirei-a'n Osana Curtis ball pet a dang bawk.

Captain Fantastic

Second half ṭan aṭanga mi-nute lina lekah captain David Lal--rinmuana'n penalty area pawn chiaha Alfred-a freekick hlawhchhuah chu petin I League best keeper Amrinder Singh-a'n a en liam - goal pawimawh leh mawi bik a ni.

Bengaluru FC-in chak turin goal li khung an mamawh a, Ash-ley-a'n an mamawh goal hlawh chhuak turin player tlan chak Udanta leh Chhuantea-te a luhtir zui bawk. Blues goal bawh a na a, substitute Brandon-a talbuaiin Udanta a tihtluk avangin penalty a chawi a, captain Sunil Chettri-a'n a pet goal.

Blues attack na chhunzawm mah se Aizawl FC tan Lalruatthara inhliam vanga lut susbtitute Lalramchullova bakah tlarhnung dangte an khel ṭha a, keeper Soram Poirei a che ṭha bawk. Bengaluru FC-in goal dang an khung belh thei lo a, 100%-a chak chiang inti Westwood-a hote an chak lo.

I League neih zawh takah Bengaluru khelmuala goal thum khung thei an awm lo a, Aizawl FC-in an thei tlat!

Das-a'n mipui a au

Aizawl FC coach Jahar Das chuan, "I League-ah khan Mohun Bagan kha champion ngei tura rin an ni a, mah se Aizawl FC an hneh loh avangin nomawi an thlauh. Federation Cup champion turin Bengaluru hi rinkai ber zinga mi an ni a, Aizawl FC-in kan pet chhuak. Bengaluru lakah game
ṭha taka kan khel a, RG Stadium-ah pawh khatiang bawk khan khelh leh ngei kan tum. Chak tumin theihtawp kan chhuah dawn a, kan mamawh chu Mizo mipui ṭawiawmna a ni," tiin mipui ṭawiawmna a ngen.

Bengaluru FC coach Ashley Westwood chuan, "Tlarhma leh tlarhnungah kan fimkhur tawk lo. Chutihrualin Aizawl FC-in fak an phu a, hmahruaitu an nih hnuah pawh goal venhim ringawt an tum lo," tiin MPL champion a fak.