2014 - OUT 2015 - OUT 2016 - OUT Bayern Munich-ah Guardiola a hlawhchham

Pep Guardiola-a'n German club a thlak danglam tih hmuh hmaih rual ni lo mah se Bayern Munich tan kum thum chhunga UEFA Champions League final thlen loh hi hlawhchhamna a ni - Spanish manager-in hna zo loin Manchester City a zawm dawn.

Thawhlehni zanah Bayern-in an mual Allianz Arena-ah thawhlehna ropui lantir tumin game ropui nen bul ṭan mah se Diego Simeone enkawl Atletico Madrid lakah 2-1 chauhin hnehna an chang. Vicente Calderon-a an inkhelhna result nen Bayern leh Atletico te hi 2-2 in an inhnehtawk a, away goal rule hmangin German club an tla.

Sa huai an ser

Ticket hralh zawh vek a ni a, Bayern khelmualah beiseina nen mi 70,000 an pungkhawm. Guardiola-a'n kartawpa Borus-sia Monchengladbach an hmachhawn ṭumin player pawi-mawh pasarih a awltir a, Atletico lakah erawh an ṭhat theih dan berin an lut. Ni sarih liam taa Madrid-a bul ṭan lo Jerome Boateng, Thomas Muller leh Franck Ribery te an inlan nghal.

Atletico boss Diego Sime-one-a'n kartawpa Rayo Vallecano an hneh ṭumin player a siksawi ve tho a, Bayern laka result ṭha nei turin Fernando Torres leh Antoine Griezmann te chu hma tawngah awm nghalin defence lai luahlum turin centre back Diego Godin a dam leh tawh bawk.

An mawi e

Bayern Munich-in chak duhin inkhel bul an ṭan a, Atletico tlarhnung ṭhiat turin football mawina lang telin awmze neiin an nawr. Guardiola hote ball inpe kualah tlarhnung rem phui thiam Diego Simeone hote an talbuai a, Atletico venghimtu chu goalkeeper Jan Oblak a ni.

Slovenian keeper hian Robert Lewandowski, Muller, Arturo Vidal leh Ribery te goal khung tur a dan sak a, amaherawhchu minute 31-naa Xabi Alonso-a freekick erawh José Maria Gimenez-a'n a lo khawih kawi avangin a dang thei lo.

Goal luh hnu minute thum-naah Uruguayan defender Gime-nez-a'n Bayern defender Javi Martinez a kawih thluk avangin penalty a chawi a, German chhuanvawr Muller-a pet chu Oblak-a'n a dan sak. Bayern hian nawr chhunzawm zel mah se first half-ah goal dang a luh belh lo.

Simeone hun

Argentine manager Diego Simeone-a'n game thlak danglam turin first leg-a che ṭha, first half-a pawimawh lo central midfielder Augusto Fernandez aiah Yannick Fer-reira Carrasco a luhtir. Belgian winger Carrasco awm hnuah Atletico-in rang zawkin counter attack an neih theih phah.

Second half-ah Bayern goal bawh a la na reng a, minute 53-naah Atletico-in an nawr let thut a, Torres-a'n a kawppui Griezmann chu tlantirin French forward hi offside mah se assistant referee-in a hmuh hmaih a, Atletico forward hian Manuel Neuer chauh a hmachhawn hnuah cool takin a khung.

Goal khat hlu bik Atletico-in an khung avangin Bayern-in goal hnih dang an mamawh a, talbuai loa nawr zelin Oblak-a che ṭha chhunzawm zel. Minute 73-naah Kingsley Coman a lut a, minute khat hnuah Lewandowski hmangin Bayern-in goal an khung.

Final lut tura goal khat la mamawh Bayern goal nawr na zualpui a reh a, minute 83-naah Torres chu box pawnah chiah Martinez-a'n titlu mah se referee-in penalty a pe tho. Liverpool striker hlui penalty pet hi Neuer-a'n dangin Bayern-in beiseina an neih chhunzawm zel.

Ropui taka inkhel bul ṭan Bayern chu hun tawp lamah an zuih a, minute 180 chhung inbeihnaah Pep Guardiola aiin Diego Simeone a ding chang.

Bayern faktu Simeone

Real Madrid leh Barcelona lo tum fo tawhtu Atletico Ma-drid manager Diego Sime-one chuan, "Tun aia team ṭha hi ka la tawng ngai lo a, first half-a an khelh dan phei kha chu a ropui lehzual. Hetiang game hi hmuh nuam ka ti a, a chhan chu ka team-te pawh an khelṭha a ni. Bayern khan nasa takin pressure min pe a, kan hlawhtlinna hi a ropui a ni," tiin a khingpuite a fak rualin a player-te ṭhatna a hmuh hmaih lo.

Argentine manager hian penalty an hlah avanga beiseina an neih chhoh leh thu a sawi a, tunah chuan player a nih laia a ropuina hmun San Siro-ah May 28 zan hian Real Madrid leh Manchester City chak zawk nen final an khel ang.

Atletico tan final vawi thum an luhna chiah a ni a, Bayern Munich leh Real Madrid laka an chak loh avangin nomawi erawh an la chawi lo.

Pep-a thukhawchang

Bayern Munich manager Josep Guardiola chuan, "Atletico Madrid ka lawmpui e. Inkhel hmuhnawm tak kan pho chhuak a, a en tawh phawt chuan hmuhnawm an tih vek ka ring. Kan theihna zawng zawng kan chhuah a, ka player-te khelh dan ka chhuang takzet. A tawpah erawh a vanduai zawkah kan ṭang a, ka player-te ka tawrhpui a, chutihrualin kan khelh danah erawh sawisel tur ka nei lo a, ka lungawi a ni," tiin an khelh ṭhat thu a sawi.

Spanish manager sawi ang hian Bayern hi an khel ṭha a, 71% ball possession neiin goal attempt vawi 17 an nei a, goal zawnah vawi ruk an pet.

Champion chungchang sawiin Guardiola chuan, "Champion hi ka tum ber a ni a, chumi tur chuan kan thawkrim. Nomawi chawi lo mah ila cham reng erawh ka tan a theih tawh lo a, chutihrualin helai hmun hi nuam ka ti takzet a ni. Nomawi hi chu number mai a ni a, ka sawi theih chu Bayern tan hian ka theihna zawng zawng ka chhuah a, player-te pawhin hma an sawn avangin inchhirna ka nei lo," tiin a hnathawhah a lungawi thu a sawi.

Bayern Munich hian Bun-desliga-a kum li a zawna champion turin point hnih chiah an mamawh tawh a, anmahni hnaih bertu Borussia Dortmund nen May 21-ah German Cup final an khel dawn. Spanish manager hian Bayern-a kum thum chhungin Bundesliga nomawi vawi hnih a chawi tawh bakah DFB Pokal, UEFA Super leh FIFA Club World Cup a champion tawh a, kuminah Bundesliga leh DFA Pokal a la chawi hmel bawk.

Pep Guardiola hlawhtlinna hi ropui viau mah se Champions League semifinal-a Spanish club pathum Real Madrid, Barcelona leh Atletico Madrid laka an chak loh avangin an phu tawk chawimawina nen Germany a chhuahsan dawn lo.