Hazard leh Casemiro-ten Covid-19 an kai

Vanduainain Eden Hazard-a kiansan hleithei lo - Belgian forward hi hliam vanga rei tak a chawlh hnuah tun hnaiah a lo kir leh a, mahse Covid-19 a kai tih hmuchhuah a ni. 

Hazard bakah hian Real midfielder pawi-mawh Casemiro chuan hripui hi a kai ve bawk a, player pahnih hi dan angin an inkhung hrang zui ang. 

Real thuchhuahin a tarlan danin Zirtawpnia an test hnuhnung ber aṭangin player pahnih chiah hian Covid-19 hi an kai a, kartir lam khan defender Eder Militao chuan hripui a kai thu an lo puang tawh bawk. 

Kum 29 mi Hazard hi international break-ah ram tan inlan tura koh a ni a, mahse Covid-19 a kai takah chuan Switzerland nena Nilaini zana friendly match an khelh turte, Nations League-a England (November 15) leh Denmark (November 18)  an mikhual turahte a inlan thei dawn lo tihna a ni. 

Hazard hian tun season-ah hliam vangin Real tan match thum chauh a la khel a, goal khat a khung tawh.