PSG chakna Di Maria

Player hliam ngah vanga buai mek Paris St-Germain chuan Angel Di Maria an la neih miau avangin point thum an hmu. French Ligue 1 champion hian Inrinni zana an mikhual Rennes chu 3-0 in an hneh a, Argentine forward in goal hnih a khung bakah assist a nei.

PSG tan Moise Kean chuan minute 11-naah goal hmahruai a khung a, a siamsaktu chu Di Maria a ni. Real Madrid leh Manchester United tan pawha khel tawh player hian minute 21 leh 73-naah goal a khung belh bawk.

Thomas Tuchel-a'n hliam vangin a player langsar ṭhenkhat - Kylian Mbappe leh Neymar bakah Juan Bernat, Mauro Icardi, Presnel Kimpembe, Julian Draxler, Pablo Sarabia leh Marco Verratti te a chhawr thei lo.

German manager Tuchel chuan, "Player ṭhenkhat inlan thei lo mah se midang an thawkrim em em a, an theihna zawng zawng an hlan avangin kan mamawh zat goal kan khung thei, tunah chuan muang mara inngaihtuahna hun kan nei ve tawh ang," a ti.

PSG hian Ligue 1 match 10 khelh aṭangin point 24 hmuin hma an hruai a, pahnihna Lille aia match khata khel tamin point ngain an sang zawk. Ram leh ram inelna a tlakzeh dawn avangin November 21, Inrinni zanah AS Monaco an hmachhawn leh chauh ang.

Zirtawpni zan khan Marseille chuan Strasbourg 1-0 in an hneh a, point 18 hmuin palina dinhmun an luah. Inkhel dangah Montpellier pawhin Bordeaux lakah 2-0 in hnehna an lo chang ve bawk.