Season tawpah Toni a chawl dawn

Verona striker Luca Toni chuan season tawp ruala inkhelh a chawlh-san tur thu a puang a, Ita-lian striker hian a match hnuhnung ber chu Pathianni zana a club hlui Juventus an hmachhawn hunah a khel ang.

Kum 38-a upa striker hian season hmasa khan Verona tan league-ah goal 22 ngawt a khung a, Inter Milan striker Mauro Icardi nen goal khung zat inangin defender ṭhatna hmun Serie A-a top scorer ni thei upa ber a ni.

Kum 2006 Italy World Cup champion team-a an player pawimawh pawl Toni hian Serie A-ah club hrang pariat tan khelin league match 343 a khelhah goal 156 a khung a, season ṭan dawn khan sum tamna China lam pan tur anga sawi ni mah se Verona-a a hun tawp hman a thlang ta zawk.

FIFA World Cup All-Star Team 2006-a lang thei striker hian Bayern Munich tan a khelh laiin kum 2007-08 khan league match-ah goal 24 khungin top scorer a ni a, UEFA Cup-ah goal 10 khungin goal khung hnem ber a ni bawk.

Kum 2005-06 khan Fiorentina tan league-ah goal 31 khungin Europe-a goal khung hnem ber a ni a, a hun tawp lam hmang tawh chungin season hmasa khan Serie A Team of the Year-ah a la lang pha cheu bawk.

Mimal anga a hlawh-tlin viau rualin Toni hian club-ah erawh hlawh-tlinna a chhar tam tawk lo a, Bayern Munich tan a khelh laia league nomawi pahnih, German Cup pahnih leh German Super Cup nomawi pakhat a chawi tih loh chu hlawhtlinna dang a chhar tam lo.