Chelsea leh Spurs thubuai an siamsak

Football Association chuan Chelsea leh Tottenham Hotspurs-te chu Thawhṭanni zana an inkhelh ṭumin khelmual chhungah an player-te an thunun tawk loh avangin thubuai a siamsak.

Team pahnih 2-2 a an inhneh-tawkna inkhelah hian Tottenham boss Mauricio Pochettino chu Spurs defender Danny Rose leh Chelsea winger Willian intibuai pawt ṭhen turin khelmual chhungah a luh a ngai hial a, hun tawp hnuah Rose hian Blues boss Guus Hiddink chu a nam thlu bawk. Inkhelh chhungin yellow card vawi 12 lai phawrh a ni a, vawi hnih lai buaina a chhuak.

Spurs midfielder Mousa Dembele chu Diego Costa mitah a khawih sak avangin thubuai siamsak a ni. Referee Mark Clattenburg chuan Dembele hi hrem lo mah se TV replay-ah Belgian midfielder chet dan hi a lan avangin FA chuan thubuai an siamsak ta tho a ni.

Dembele hian nizan dar 10:30 thleng khan a thubuai khinletna hun hi a nei a, a khinletna pawm a nih loh emaw a khinglet lo a nih chuan match thum inkhel thei lo tura hrem a ni ang. Chelsea leh Tottenham hian Thawhṭanni zan dar 10:30 thleng an thubuai khinletna hun zan nei thung.