Pound maktaduai 100 man inkhel

Inrinni zan dar 5:00-ah Middlesbrough leh Brighton an inkhel dawn a, he inkhela chak zawk zawk hian season tharah Premier League an khel dawn a, Premier League kai thar sum dawn tur zat hi pound maktaduai 100 vel a nih avangin team pahnih inkhel tur hi a pawimawh hle.

Boro coach Aitor Ka-ranka chuan an inkhel tur chu sum ai maha pawimawh a nih thu sawiin, "Sumin a lei theih loh chu kan fan-te hlimna leh lawmna a ni a, chu chu pound maktaduai 100 ai hian a hlui zawk a ni. Kan match tinah mi an thlawp a, kan tan an awm reng ṭhin," tiin an fan-te hlimna chu an tan a hlut ber thu a sawi.

Karanka chuan inkhela fan-te pawimawh zia sawi lang nghalin, "Fans tam tak pungkhawm hian danglamna an thlen thei a, kan tan chuan kan player 12-na an ni. Kan khelmuala inkhel tur kan nih avangin kan vannei hle a ni," tiin season thara Premier League khelh ngei a tum.