USA lamah Joe Cole a kal dawn

England midfielder Joe Cole chuan season tawp ruala Coventry City chhuahsanin USA club Tampa Bay Rowdies a zawm dawn a, Tampa Bay hi Major League Soccer (MLS) hnuai chiah North American Soccer League-ah an khel mek.

Kum 34-a upa midfielder hian nikum November khan Aston Villa aṭangin loan-in Coventry hi a zawm a, January thla khan a thlawnin a nghetin League One club hi a zawm.

England tana vawi 56 inlan tawh midfielder chuan, "United States-a khelh hi ka duh fo ṭhin a, ka chhungte nen thla rei lote liam taah khan chawlh hmangin kan zin a, nuam kan ti em em a ni. Football-ah hian tih tur tam tak ka la nei a, USA-ah hian chawlh hmang turin ka kal dawn lo," tiin US a pan chhan a sawi.

Kum 2006 Premier League Team of the Year-ah pawh lo lang tawh Joe Cole hian West Ham
aṭanga Chelsea a pan hnuah Premier League (3), FA Cup (3) leh League Cup (2) nomawite a chawi a, Stamford Bridge-a chhuahsan hnuah Liverpool zawmin Anfield-a kum thum a cham chhungin match 42 chiah a inlan.