Europa League final-ah Liverpool leh Sevilla

Liverpool-in Premier League-a Swansea an hneh loh ṭumin Jurgen Klopp-a'n Europa League-ah an thawh leh nghal tur thu a sawi a, Reds manager hian dawt a sawi lo.

Ningani zan khan Liverpool chuan Europa League semifinal first leg-a 1-0 a an hneh loh hnu Villarreal lakah phuba lain 3-0 in an sawp a, inkhel pahnih belhkhawmah 3-1 a hnehna changin Europa League final an lut.

Anfield-a inkhelah hian red card, own goal, striker goal, passing mawi, dribbling mawi tak tak hmuh tur a awm vek a - football famkimna a inlar chhuak.

Europa League semifinal inkhel dangah champion lai Sevilla chuan 3-1 in Shakhtar Donetsk an hneh a, inkhel pahnih belhkhawmah 5-3 a hnehna changin season thum chhung a zawnin Europa League final an lut - May 18 zanah Liverpool nen Basel khawpuiah nomawi an inchuh ang.

Kum kaw hnuah

Liverpool-in Europe-a final an luh hnu-hnung ber chu kum 2007 Champions League final-a AC Milan an hneh loh kha a ni. Reds-in Europe inelnaa final lut turin kum kaw dang an nghah a ngai a, an kawng sah en saktu chu an khingpui captain Bruno Soriano a ni.

Inkhel ṭan aṭanga minute 7-na lekah Villarreal defensive midfielder hian an lamah a ti goal a, Roberto Firmino-a ball pet phei Daniel Sturridge-a tlawh hman loh chu an lamah a dang lut. Goal dang erawh a lut lawk thei lo a, Liverpool-in 1-0 a hmahruai chungin chawlhlawk an hmang.

Reds an inlar

Second half khelh a ni a, Liverpool tlarhmaten chak an tum tih khelmual chhungah pholangin Villarreal keeper Alphonse Areola a lang ngun hle!

Liverpool midfield-ah James Milner, Philippe Coutinho leh Adam Lallana-te an thawkrim a, kar thum chhung hliam vanga a chawlh hnua lo kir leh Emre Can-a'n Reds tan player ṭangkai a nihzia a pholang bawk.

Minute 63-na a ni a, Liverpool-in goal an khung ta nge nge. Khel ṭha em em mai Firmino thawhrah zarzoin Sturridge chuan 'striker goal' a khung a, Liverpool-in hma an hruai chhunzawm.

Reds player ball thiam rual hmaa talbuai Villarreal player-ten an thinrimna an bengdai zo lo a, minute 71-naah Victor Ruiz chu Lallana a rah luih avangin yellow card vawi hnihna pek niin hnawh chhuah a ni.

Liverpool-in goal hnihah an duhtawk lo. Brazilian forward Firmino-a'n hlauhawm taka ball a lakluh hnuah Sturridge tan ball a siamsak a, English striker hian goal zawnah petin Lallana chuan mawi takin a lo thai goal a, minute 81-naah Liverpool-in 3-0 in hma an hruai.

Si thum phur chunga player kim loa khel Villarreal tan thawh leh ngaihna a awm tawh lo. An club chanchina Europe inelnaa final lut hmasa ber nih an tumna chu manager Marcelino leh a nauten an ti hlawhtling thei ta lo.

Eng nge an sawi?

Liverpool manager Jurgen Klopp chuan, "Zan ropui a ni a, ka naute khan an khel ṭha takzet a ni. He hmun ka rawn pan hma khan mi tam takin Liverpool chungchang hi an sawi a, an sawi ber chu he team quality leh transfer-a an chet ṭhat loh thu a ni. Mahse, kei chuan he team hian squad ṭha tak an nei a ni tih ka hriat avangin ka pan a, tunah chuan Europe-ah final kan lut ta," tiin Anfield-a pan chu tifuh a inti hle.

Villarreal boss Marcelino chuan, "Kan ruahman angin engmah a kal lo a, goal kan chhuah hma lutuk kha kan tuar a ni. Team thawkrim leh taima tak kan hmachhawn a, kan tan chuan a harsa hle. Liverpool khan keini aiin an khel ṭha zawk ngei a, mah se chuti chung chuan chance tam erawh an nei lo. Player kim loa kan khelh kha chuan inkhel kha a tawp tawh tih ka hria a ni," tiin an ruahman anga engmah a kal loh thu a sawi.

Sevilla chakna Gameiro

Sevilla leh Shakhtar Donetsk inkhelah Spanish club tan Kevin Gameiro a langsar a, French forward hian an mikhual Ukrainian club lakah ṭhat chhuah duh loin goal hnih a khung a, Europa League final-ah Sevilla a hruai thleng.

Team pahnih hi an inhmachhawn hmasakah 2-2 a an lo inhnehtawk tawh avangin khualmuala goal hnih khungtu Sevilla dinhmun a ṭha hle. Mahse, Spanish club-in first leg-a an goal khung sa ring chunga chak ringawt an duh lo.

Inkhel ṭan aṭanga minute 9-na lekah Gameiro chuan a tharum neih leh tlan chak chhawr ṭangkaiin goal hmahruai a khung a, Shakhtar tan Arsenal striker hlui Eduardo chuan minute 44-naah a sut ve nghal.

Chawlhlawk hman a ni a, minute hnih hnu lawkah Gameiro-a'n Sevilla goal hnihna a khung lehnghal a, Mariano chuan minute 59-naah chhunzawm ve lehin Europa League-a Shakhtar zin kawng a tawp zui bawk.

Tun hmaa UEFA Cup tih ṭhin Europa League-ah season thum chhung a zawna champion thei an la awm ngai lo a, Sevilla (2006, 2007 leh 2014, 2015) leh Real Madrid (1985 leh 1986)-te chu record nei ṭha pahnih an ni. Basel khawpuiah Sevilla-in history ropui zawk ziah theihna hun
ṭha an nei dawn e.