Champions League khelh inchuh chu

Arsenal, Manchester City leh Manchester United te hi an hming en mai chuan champion inchuh tur a ni a, Premier League match hnih khelh hmabakah club lian pathum hian UEFA Champions League hmunruak pahnih an inchuh. English club zingah Leicester City leh Tottenham ten Europe club-te inelna sang ber an khel chiang tawh a, club pathum zinga pakhat hi an hnawng dawn.

City Vs Gunners

Manchester City-in Pathianni zan dar 8:30 hian Etihad Stadium-ah Arsenal an mikhual dawn a, City-in captain Vincent Kompany an chhawr thei dawn lo a, Gunners-in defender Per Mertesacker tel loin an khelh a ṭul bawk.

Manuel Pellegrini hote hian Arsenal emaw Swansea City emaw laka point an hloh a, Manchester United-in an hmabak match thum an chak vek chuan season tharah Spanish manager Pep Guardiola hoin Europa League an khel ang. Real Madrid laka chak lo zo hlim City tan tluk rei a thiang lo a, tun season-a semifinal an tlenna khel zel turin Gunners hneh ngei ngei a ṭul.

Arsenal-in Mertesacker leh Alex Oxlade-Chamberlain te chhawr thei dawn lo mah se midfielder Santi Cazorla chuan harsatna nei loin Under 21 tan a inlan. Arsene Wenger-a hote tan Champions League khel turin City emaw tla chiang tawh Aston Villa emaw aṭanga point thum an hmuh a tawk a, nomawi chawi pha si loin Europe-a inelna sang an khel leh dawn niin a lang.

Van Gaal hmalam

Manchester United hian FA Cup final bakah league match pathum khelh tur an la nei a, tla thei dinhmuna ding Norwich City khelmual Carrow Road aṭanga point thum hmuh a har dawn. United khelh hmabak hian Louis van Gaal-a hmalam hun a hril ang.

Dutch manager Van Gaal chuan, "Old Trafford-ah Norwich an chak a, phuba kan lak a ṭul a ni. Norwich hian Premier League khelh tumin theihtawp an chhuah dawn a, khelh a harsa dawn. Chutichung chuan chhuanlam siam a thiang lo," tiin chak ngei an mamawh thu a sawi.