Jeje-a'n a pet goal zel

Federation Cup semi-final khel tur a hriat kim ta. Ningani zan khan Mohun Bagan-in Barasat Stadium-ah Salgaocar 4-0 in an sawp a, khualmuala 3-2 a chak Mariners hian inkhel pahnih belh-khawmah 7-2 in hnehna an chang.

Mohun Bagan hi Fed Cup-ah vawi 13 cham-pion tawhin nomawi chawi ngun ber an ni a, semi-final-ah East Bengal hnehtu Shillong Lajong an hmachhawn ang.

Jeje Goal

Mariners hian Tilak Maidan, Goa-a Jeje goal hnih vangin semifinal thleng turin draw chiah an mamawh. Amaherawhchu Sanjoy Sen hoten Goan club lakah an chungnunna lantirin Japanese mid-fielder Yusa Katsumi hmang--in minute 25-naah hma an hruai a, Sony Norde goal hnih (45+1', 52') hmangin dinhmun
ṭha zawkah an awm leh a, hun tawp hma hretin Jeje-a'n a pet goal leh bawk. Tun dinhmunah chuan Mohun Bagan inkhela Jeje-a'n goal a khung loh chuan a kim tawh lo.

Jeje hian Fed Cup-ah goal thum a khung tawh a, Aizawl FC striker Joel Sunday nen top scorer an ni mek. Mizo tlangval hian I League neih zawh takah khan goal li a khung a, FPAI player of the year a thlan a nih hnuah goal li (AFC Cup chhiar telin) a khung ta bawk.

Pathianni zan

Jeje telna Mohun Bagan-in Pathianni zan dar 7:00 hian Barasat Stadium-ah Shillong Lajong an mikhual nghal dawn a, inkhel hi Ten 2-ah a en theih ang. Semifinal second leg hi JN Stadium, Shillong-ah May 14 hian khelh tur a ni.

Federation Cup final hi May 21, 2016-ah khelh tur a ni a, inelna neihna hmun tur tihchian a la ni lo.