La Liga Club pathum nomawi chuhin an inum
La Liga-ah match hnih chiah khelh tur a awm tawh a, Paris St Germain leh Leicester City te an ram league-ah an champion tawh vangin Barcelona kawng a awlsam phah lo. Tun Pathianni zan hi La Liga nomawi inchuhna kawnga hun pawimawh a ni a, champion tur hriat hun erawh May 15, Pathianni a nih ngei a rinawm.
Club 3 chu
Season chanve a thlen chhoh meuh chuan La Liga lam chu kum dang ang bawkin Barcelona, Atletico Madrid leh Real Madrid inumna a ni chho a, Lionel Messi telna Catalan club chu nomawi chawi tura rinkai ber an ni. Amaherawhchu Luis Enrique hoten El Clasico-ah Zinedine Zidane hote an ngam lo a, Champions League-ah Diego Simeone nauten Barca an petchhuak bawk.
Barcelona-in league lama an hmelma Real an hneh loh zawhah Real Sociedad leh Valencia an hneh lo chhunzawm a, Sporting Gijon sawpin Real Betis hneh leh mah se vawi thum chak loh avangin Catalan club hi Atletico Madrid nen an point hmuh zat a inang a, Real Madrid-in club pahnih hi point khat chiahin an pha lo.
Tehfung chu
La Liga hi Premier League te anga point hmuh inzat an awm a, goal difference enna inelna a ni lo. Spain inelna sang berah hian head to head en a ni a, Barca hian tun season-ah Atletico vawi hnih an hneh tawh avangin an hmabak match hniha an chak chuan an champion ang.
Catalan club hi Zinedine Zi-dane-a hoten hneh mah se Rafael Benitez-a enkawl Real Madrid chu 4-0 zeta an lo sawp tawh avangin Los Blancos lakah pawh an chungnung tho. Madrid khaw club pahnih inkarah erawh Atletico an chungnung a, club pathum hi an intum tawh dawn loh avangin point hmuh inang an awm a nih chuan Real Madrid dinhmun a chhe ber.
2006-07 season khan David Beckham hoin Real Madrid-in nomawi an chawi. Hemi ṭum hian Barcelona nen an point hmuh zat inangin Catalan club hi goal difference-ah ṭha zawk mah se head to head-a ṭha zawk Real Madrid an champion.
Pathianni zan
Barcelona hmachhawn tur hi Espanyol an ni a, Catalan Derby hi chetsual theihna a ni. Kum kaw liam ta khan Barca hian champion turin match hnuhnung ber dawttuah Espanyol hneh a ṭul a, amah-erawhchu hun rei zawk 2-1 in Frank Rijkaard hoten hma hruai a, inkhel dangah Real Zaragoza-in hun tawp dawn thlengin Real Madrid lakah 2-1 in hma an hruai bawk.
Thilmak a thleng a, Raul Tamudo goal hmangin Espan-yol-in an siphurh an sut a, Real Madrid-in Ruud Nistelrooy hmangin an siphurt an sut ve bawk. Season tawp hma match khat chiah a la awm tihin Real Madrid leh Barcelona point hmuh zat a inang a, club pahnih hian an match hnuhnung berah hnehna an chang ve ve a, nomawi chawitu chu Real Madrid an ni.
Barcelona manager Luis Enrique chuan Espanyol an hmachhawn hunah a player ṭhate a chhawr thei vek dawn a, chetsual theihna ni mah se chak tura rin an ni.
Atletico Madrid-in tla chiang tawh Levante chu Ciutat de València-ah an tlawh ang. Bayern Munich lama goal pawimawh khungtu Antoine Griezmann chuan, "Champions League final hmain league match pahnih kan nei a, final kan thlir hmain Levante leh Celta ringawt kan ngaihtuah a ṭul. Final ringawt kan thlir chuan league title kan hloh ang," tiin a sawi.
Real Madrid-in Santiago Bernabeu-ah Valencia an mikhual dawn a, Zinedine Zidane-a hoten Champions League final an luh bakah league-ah vawi 10 a zawnin an chak tawh. Amaherawhchu Valencia hian Gary Neville-a awm loh hnuah Barcelona an hneh tih theihngilh loh a ṭha.