India player Pasarih an chiang ta

Badminton World Federation chuan Ningani khan ranking thar a ti chhuak a, hei hian Indian shuttler pasarihte chu Rio Olympic-ah an inlan thei chiang dawn tih a nemnghet.

Olympic-ah hian category hrang hrang men single, women single, men double, women double leh mixed double-ah te inelna neih tur a ni dawn a - henga inlan tur hian kum 2015 May 4 aṭanga kumin May 1 chhunga player cheṭhate thlan chhuah an ni.

Kuminah hian mipa leh hmeichhe single-ah ram pakhatin player pahnih a neih theih dawn a, mahse BWF ranking-a a sang 16 zinga mi an nih a ngai thung. Kuminah hian India chuan hmeichhe single player pahnih nei dawnin Saina Nehwal leh PV Sindhu te an inlan dawn. India bakah China (Li Xuerui, Wang Yihan); Japan (Nozomi Okuhara leh Akane Yamaguchi) leh Korea (Sung Ji Hyun leh Bae Yeon Ju) te chu player pahnih thawh thei tur zinga mi an ni.

India tan hian hmeichhe double-ah Jwala Gutta leh Ashwini Ponnappa te chu a vawi hnihna Olympic-ah an inlan dawn a, mipa single khel tur Kidambi Srikanth leh hmeichhe single khel tur Sindhu te bakah mipa double pair Manu Attri leh B Summeth Reddy te chu Olympic-a an inlan vawi khatna tur a ni bawk.