Fan-te lawm hlawh lo Guardiola leh Hummels

Bayern Munich fan-te chuan Champions League semifinal-a Atletico Madrid an hneh loh
ṭum-in an manager kalchhuak tur Pep Guardiola an au el a, Spa-nish manager hian Ingolstadt an hmachhawn hunah fan-te rilru na thawidam theihna hun a nei dawn.

Barcelona manager hlui hian season tharah Manchester City a pan tur thu kumin kumtir khan a ti chiang tawh a, Bayern tan ka theihna leh thiamna zawng zawng ka hlan ti mah se a zawna season thum chhung Champions League final an luh zawh loh avangin fan-te an lungawi lo a ni.

Zanin dar 7:00 hian Bayern hian tun season-a an league match hnuhnung ber dawt khel turin Ingolstadt kelmualah an leng lut dawn. Guardiola naute hian hnehna an chang a nih chuan German football chanchina a zawna kum li chhung Bundesliga title la thei hmasa ber an ni ang.

Bayern captain Philipp Lahm chuan, "Atletico lakah khan kan theihna zawng zawng kan hmang a, mah se a tawk zo lo. Tunah hian lungngaia indawm kun ringawt tur kan ni lo, a chhan chu nomawi pahnih chawi chunga season khar thei kan la ni," tiin a sawi.

German champion Bayern hi Bundesliga nomawi chawi chiang tura ngaih an nih bakah May 21 khian Dortmund nen German Cup final an la khel dawn a ni.

Bundesliga lama Bayen Munich elpui Borussia Dortmund fan-te pawhin an defender Mats Hummels chu kar hmasa a Wolfsburg 5-1 ngawta an sawp ṭumin an lo au el ve tawh bawk.

Germany international hian nipui transfer bazar inhawn hunah Bayern zawm a duh thu a lo sawi tawh a, hei hi Dortmund fan-te chuan an ngaithiam lo takzet. Hummels hian Bayern a zawm a nih chuan midfielder Mario Gotze (2013) leh striker Robert Lewandowski (2014) te hnung a zui dawn tihna a ni.

Dortmund hi zanin dar 7:00 tho hian Eintracht khelmualah an leng lut dawn a, an chak lo emaw point an hloh hrim hrim a nih chuan Bayern an champion chiang tawh ang.