German ral lian tâwnah Arsenal an tlawm!

A kaw tawpah an ṭang a, player bakah Allianz Arena khata tlata mipui pungkhawmte chuan Arsenal an rum ṭhaih, a tawpah chuan Bayern Munich lamin an duh leh tum ang ngeiin 'Hnehna' an chang.

German club lian hian Joshua Kimmich-a goal khat tauh luh hmangin Arsenal 1-0 in an hneh. Emirates Stadium-a an intawn ṭumin team pahnih te 2-2 in an inhnehtawk, inkhel pahnih belhkhawmah Bavarians hi 3-2 in an chak.

Thomas Tuchel-a kaihhruai Bayern Munich hian semifinal-ah chuan Real Madrid an hmachhawn leh ang - Spanish club lian hian quarterfinal inkhel dangah champion lai Manchester City chu an lo hneh ve thung a ni.

Mamawh chhanna

Bayern Munich lamin hliam vangin Serge Gnabry leh Kingsley Coman te an chhawr thei lo a, tlarhma sir lama an hmawnraw neih hlauhawm chu Leroy Sane a ni - Mikel Arteta nauten Sane hi an veng uluk hle, a hmachawn turin Takehiro Tomiyasu dah luh a ni.

German club lamin goal khung aiin a venhim lam an ngai pawimawh hmasa, mahni an inven karah Jamal Musiala-a'n goalkeeper David Raya tan hna a siamsak zauh a, ani ang bawk hian Martin Odegaard pawhin shot nei ṭha mah se Manuel Neuer a paltlang lo.

First half chhunga goal khung theihna remchang nei ṭha ber Gabriel Martinelli pawhin Neuer a paltlang thei lo, hnai tak aṭanga pet luh zauh mai theuh tur nia lang chu German goalkeeper hian a lo dansak hman hram a ni.

Goal khung mamawh ve ve an ni a, na tak erawhin an innawr ngam lo. Bayern Munich midfielder Leon Goretzka-a'n remchang ṭha neiin goal bar a tih per bawk a, mahse an vannei thei mai bik lo - Harry Kane chuan hna a hmu meuh lo bawk.

Arsenal lamin Sane an ven luatah a hnung aṭanga rawn tlan hma ṭhin Kimmich-a'n hmun ruak a nei tam a, a ka aṭangin ball a chhuak hlauhawm ṭhin hle, second half-ah goal awmchhun a tauh luh dawn pawhin box chhungah vengtu nei loin a awm.

Germany international Kimmich hian tun season UCL bikah goal a khung vawi khatna a ni, khung tam lo mah se semifinal an luh theih chhan a ni. Tlarhma lam an 'nil' zanah mamawh chhanna a ni thei a, a hlutna a la sang takzet.

Arsenal an chuai

Aston Villa an hneh loh avangin Arsenal hian Premier League hmahruaitu an nihna an hloh zo chiah a, beisei nei chungin Germany pan mah se an beiseina chu a zamral zui leh ta, tun season atana EPL chauh beisei tur a nei tawh.

Hliam damkawr chungin Bukayo Saka chu khelh tir a ni. England international hi Gunners hmanraw hlauhawm ni mah se ni dang angin a hriam lo, mual sir lehlama awm Martinelli chu Kimmich hmaah a tlang thei lo bawk, a sir aṭangin ball hlauhawm a chhuak thei lo.

Goal mamawh hunah bench aṭangin Gabriel Jesus leh Leandro Trossard te dahluh an ni a, mahse awmzia a nei thui vak lo. Villa an hneh loh ṭum angin Jesus hi a hmaah awmin Havertz pawh hnun a ni a, an tihsual ngaiah bawk an tisual nawn.

Eddie Nketiah pawhin thil mak a ti thei bik lo. Arsenal hian thlasik bazar lai khan striker ṭha an mamawh thu sawi lan a ni ṭhin, mahse lei loin an insiamṭha, goal khung pawh an harsat lem lo - league lamah phei chuan an khung thei mawlh mawlh hle.

Amaherawhchu, team ṭha lakah chuan goal khung theihna remchang insiam a harsa, hun ṭha vawi khat hmuh lek goal atana chantir thei hi an pawimawh ṭhin a, chutiang striker chu North London club hian an nei lo - a bikin first leg kha en let se la an ui zual ngei ang.

A zawnin EPL leh UCL-ah an chak lo a, season dang ang bawkin hun pawimawh laiah an chesual leh phawt. Chutihrualin an beiseina zawng zawng a bo tihna erawh a la ni lo, chesual loa an kal theih chuan ṭhangkhat lian an nghah tawh EPL nomawi chawi turin kawng a la awm.