UCL beiseitu Bayern

Bayern Munich hian a zawna season 11 chhung an kawl tawh Bundesliga nomawi chu Bayer Leverkusen lakah an hloh a, league match vawi nga khelh hmabak nei chunga nomawi chan hi mualphona a tling.

Champions League quarterfinal second leg an khelh hma khan, striker Harry Kane chuan nomawi pakhat tal an chawi lo a nih chuan tun season chu an hlawhchham a nih tur thu a lo sawi tawh, tunah chuan UCL title an beiseina a la nung.

England captain Kane chuan, "Kan tan season harsa leh hautak tak a ni a, hetiang chunga semifinal thlen chu thil lawmawm tak a ni. Bayern Munich tan kan khel a nih chuan Champions League champion tura beisei kan ni," a ti.

Thomas Tuchel pawhin Bayern Munich a zawm tirh aṭangin theihtawp a chhuah thu a sawi a, a hun hnuhnung ber thleng pawh a theihtawp a chhuah tur thu a sawi nawn. UCL champion a nih pui chuan a hun duhawm lo te a hliahkhuh thei ang.