Blasters mikhual tur Odisha an inringtawk
Indian Super League pawh league round khelh zawh a ni ta a, zanin aṭangin playoff knockout khelh a ni dawn - table-a pakhatna leh Mohun Bagan SG leh Mumbai City chu semifinal lut sa an ni a, pathumna aṭanga parukna ten playoff hmangin semifinal lut tur an zawng leh dawn.
Playoff match hmasa ber chu zanin dar 7:30 hian khelh a ni dawn a, Odisha khelmualah Kerala Blasters an leng dawn - playoff hi single leg-a khelh tur a ni a, ISL nomawi mitthlatu tan chetsual palh a thiang lo.
Odisha forward Isak Vanlalruatfela chuan, "Mahni khelmuala inkhel tur kan ni a, hnehna kan chan theih mai chu ka ring," a ti a, beiseina sang tak a neih thu Vanglaini a hrilh.
Odisha an ṭha
Mumbai City tana ISL nomawi lo chawi tawhtu Sergio Lobera enkawlna hnuaiah Odisha an khel a, Spanish coach hian Mumbai leh FC Goa tan league winner shield a lo hlawh chhuak tawh bawk a, Indian football-ah a mikhual lo hle.
Odisha hian player an nei ṭha bawk - tlarhmaah Flamengo forward hlui Diego Maurício chu innghahna a ni a, tun season ISL-ah match 20 khelin goal 10 a khung tawh a, Fiji captain Roy Krishna hian goal 12 khungin assist vawi khat a nei tawh bawk.
Tlarhmaa anni pahnih nena ding leh tur Isaka sawi hmaih a thiang lo. Thingsulthliah/Bawngkawn tlangval hian tun season ISL-ah match 21 khelin goal thum a khung tawh a, assist vawi thum a nei bawk - khelmualah a hnawksak ṭhin hle.
Beiseina
Odisha forward Isaka chuan, "Knockout a ni tawh dawn a, ṭan chu a na khawp mai. Keimah pawh ka in fit ṭha a, theihtawp ka chhuah ve reng. Thil engkimah hian ka insum a ni ber mai," tiin Vanglaini a hrilh a, semifinal luh ngei a tum.
Isaka bakah K. Lalṭhathanga (Puitea) leh Jerry Lalrinzuala ten Odisha-ah hmun pawimawh an chang ṭhin a, zaninah pawh Mizo player pathum hi bul ṭan leh ngei tura ngaih an ni - an league match hnuhnung berah khan Lobera-a'n an pathum hian a chawlh hahdamtir vek.
Bethlehem Vengthlang fapa rangkachak Puitea hian tun season-ah match 20 ngawt khelin, goal khat a khung bakah goal khat a assist a, Jerry pawh match 20-ah a inlan thei - league round-ah match 22 a awm a, an khelh zat aṭanga chhutin an pawimawh tih a lang.
Di hlui
Mizoram Premier League chhul chhuak Puitea hian Kerala Blasters tan a lo khel tawh ṭhin a, South Indian club hrechiangtu a ni. Puitea chuan, "Blasters hi an player inhliamte an dam leh tawh a, Adrian Luna pawh a awm leh tawh - ani a awm hi chuan team dang daih an ni ṭhin," tiin Vanglaini a hrilh a, Luna nen hian Blasters tan an lo khel dun tawh ṭhin.
Luna hian tun season-ah league match kua khelin, goal thum leh assist vawi li a nei a, Greek strikeer Dimitrios Diamantakos hian tun season-ah match 17 khela goal 13 khungin, assist vawi thum a nei bawk a, Japanese winger Daisuke Sakai, centre back Miloš Drinčić leh India international Pritam Kotal te pawh Blasters tiṭhatu an ni.
Puitea chuan, "Pathian zarah tun season-a kan khelmuala inkhelah chak loh kan la nei lo. Mahni muala inkhel tur kan nih avangin kan inringtawk a, kan chance a ṭha zawkah ka ngai," a ti - Blasters-ah hian midfielder Freddy Lallawmawma chu Mizo player awm niin, league match kua a inlan tawh.