Pep 'City'-in Ancelotti 'Real' an ngam lo

UEFA Champions League aṭangin European champion ni ngun ber Real Madrid-in champion lai Manchester City an pet thla. Vawi khat champion tawh City tan vawi 14 champion tawh Real an 'u' hret a, manager nichunga vawi thum champion tawh Pep Guardiola aiin vawi li champion tawh Carlo Ancelotti a chungnung zawk bawk.

Nilaini zan khan Etihad Stadium-ah UCL quarterfinal khelh a ni a, mikhual team Real-in Rodrygo hmangin khung hmasa mah se City-in Kevin de Bryune hmangin an sut. Second leg-ah 1-1 a ni a, first leg-ah 3-3 a nih bawk avangin extra time khelh a ni a, chak zawn an awm chuang lo.

Penalty shootout-ah Andrey Lunin chu hero a ni a, Ukrainian keeper hian Bernardo Silva leh Mateo Kovacic te pet dansakin Real Madrid a chakpui. Manchester City tan erawh kum zawna 'treble champion' beiseina a tawp.

City an inpeih

Man City-in Ederson bakah Kyle Walker an chhawr thei tawh a, Kevin de Bruyne pawhin bul ṭan thei tawhin Santiago Bernabeu-a bul ṭantu aiin Etihad Stadium-a bul ṭantute hming a langsar zawk. Pep Guardiola hote hian season liam ta khan City-in an mualah Real hi 4-0 in an hneh tawh a, tun ṭumah hian an kim ṭhat bawk avangin ringtawkna sang tak an nei ang.

Real-in first leg-a defence laia an dah Aurelien Tchouameni hrem vangin an chhawr thei lo a, second leg-ah centre back dik tak Nacho-a'n bul rawn ṭanin Spanish defender hian captain armband a hreng bawk.

Boruak sangah Rodrygo

First leg-ah Real tan Rodrygo a langsar a, goal khat a khung. Brazilian forward hi UCL stage sangah a inlar fo tawh ṭhin a, kum 2022-a an champion pawh khan semifinal-a Man City an hneh ṭumin goal hnih a khung bawk.

Tun ṭumah pawh Rodyrgo-a'n goal pawimawh a khung leh a, minute 12-na lekah Vinicius Jr-a cross ball chu pet nghalin keeper Ederson-a'n dansak mah se a per chu goal-ah a chantir leh tho. City fan-te chuan Rodrygo theihna hi an hrechiang tawh khawp ang.

City an thiam

Real Madrid an ṭha a, mahse a thiam zawk chu City an ni. Etihad Stadium-ah khelh a ni a, goal an chhuah hma bawk nen Pep-a hote goal bawh a na hle. City-in ball an chang tam a, goal hmaah hlauhawm tel bawk.

KDB-a cross Lunin-a'n ṭha zetin a dang a, Erling Haaland-a'n crossbar tauh perin, hemi per hi Bernardo Silva-a'n goal-ah a chantir thei lo. Real-in goal venhim hna an thawk a, City chance neih angte Lunin-a'n a dang zel thung.

Second half-ah pawh hun rei tak chu thawnthu ngai a ni a, Real tlarhnung a phui ṭha hle. Mahse, bench aṭanga lut Jeremy Doku-a'n a tlan chakna a hman ṭangkai hnuah ṭha zetin a cross a, Antonio Rüdiger-a dan per chu chiang zetin De Bruyne-a'n minute 76-naah a khung.

City-in siphurh sut an phu a, goal dang khung belh tumin nawr na chhunzawm mah se KDB leh a ṭhiante vanneih zan a ni lo. Goal khung khawl Haaland pawhin scoresheet-ah a hming a nam kai thei lo.

Extra time-ah team pahnih an fimkhur a, first half-ah Rudiger-a'n chance ṭha tak a hlah. Haaland thlaktu Julian Alvarez-a'n chance ṭha a hlah ve bawk.

A huai zawk Real

Pep-a'n extra time second half-ah penatly pet thiam De Bruyne leh Haaland te a thlak a, thutlukna mak takah a ngaih theih. Penalty an pet ṭan a, Alvarez-a'n a khung laiin Real-a experience nei ṭha ber Luka Modric pet chu Ederson-a'n a dansak.

City dinhmun ṭha hman mah se Bernardo Silva-a'n a laiah a pet a, Lunin-a'n a dang. Ukrainian keeper hian Kovacic pet a dansak leh bawk. City tana pettu dang Foden leh Ederson ten khung mah se Real tana pettu Bellingham, Vasquez, Nacho leh Rudiger ten an khung vek. Etihad Stadium-ah a vawi khat nan Real Madrid an chak.

City an vanduai?

Man City manager Pep Guardiola chuan, "Haaland, De Bruyne leh Akanji te khan thlak an ngaih thu min hrilh a, an khel chhunzawm thei tawh lo," tiin penalty pet thei tura ngaihte a thlak chhan a sawifiah.

Spanish manager chuan sawi chhunzawmin, "Johan Cryuff-a'n vanneihna kan nei lo a ni, a tih ṭum ang kha kan chungah kan thleng. Theihtawp chhuahtu player-te chungah thinlung takin lawmthu ka sawi a, kan khel ṭha takzet a ni," tiin a vanduai thu a sawi.

Premier League-a roreltu ni mek Pep hi Ancelotti-a'n UCL-ah ṭum thum a hneh tawh. Kum 2014 khan Pep-a'n Bayern a enkawl laiin semifinal-ah Ancelotti-a'n Bavarians hi a hneh a, Man City a enkawl hnuin kum 2022 semifinal leh 2024 quarterfina-ah a hneh leh bawk.