Real kawr hlutna kan hrechiang - Ancelotti

Carlo Ancelotti hi manager anga Champions League-a sulhnu nei ṭha ber a ni. Italian manager hian a inkhelh hun laiin AC Milan tan vawi hnih a champion a, manager a nih hnuah AC Milan leh Real Madrid vawi hnih ve ve a champion pui.

Kum 64 mi Ancelotti chuan, "Goal kan khung hma a, kan goal neih kan venghim ṭha bawk. Kha ai khan kan nawr na thei a, mahse goal venhim kan thlang. Kan kawr hlutna kan hrechiang a, kan theihna zawng zawng kan hlan. Kan tan chuan inelna hlu bik a ni a, mipuiin min beisei loh pawhin kan tum ram kan hlen leh mai ṭhin," tiin rinkai lo zawk ni chunga an chak thu a sawi.

Penalty chungchang sawiin Ancelotti chuan, "Player-te kha an inringtawk vek a, chuvangin a pet hmasa tur panga thlan kha a har lo. Lunin pawh a inbuatsaih ṭha bawk," a ti.