A hming chu Valverde

Santiago Bernabeu-a siphurh sutna goal mawi zeta khungtu Fede Valverde-a'n Etihad Stadium-ah goal a khung nawn tawh lo. Mahse, first leg ang thoin second leg-ah pawh Valverde hi man of the match-a thlan a ni.

Real Madrid chungchang sawi chuan Vinicius Junior, Jude Bellingham, Toni Kroos leh Luka Modric te hming a langsar ṭhin a, Valverde hi langsar lutuk si lo - team tana innghahna ni pha ni thung.

Valverde chuan, "Coach-in ti tura min tih angte kan zawm ṭha. Kan khingpuite goal bawh a na a, game ṭha tak an khel. Chutihrualin keini pawhin kan zahawmna humhim turin theihtawp kan chhuah ve bawk," tiin a sawi.

Uruguayan midfielder Valverde hi minute 120 chhung a tlan a ni ber a, pass vawi 45 a nei a, pass tam tia sawi tur a ni lo. Mahse, extra time-ah pawh a la tlan reng thei khan team tana inpekna san zia a sawifiah.