Liverpool nena sawizawm Amorim a chhuak lo mai thei

Premier League club ṭha Liverpool-a Jurgen Klopp thlak tura sawi, Sporting Lisbon coach Ruben Amorim chuan tun hnaiah chhuak tur anga sawi thawm awm chungchang a sawi chhuak leh a, a fapa ngaihdan a lak tel thu a sawi!

Reds hian an duh ber chu Xabi Alonso a ni a, mahse, an player hlui hian Bundesliga nomawi a chawipui tak Bayer Leverkusen lama cham a tum avangin, rang takin Amorim lam an hawi.

Khawthlang media ṭhenkhat chuan Amorim hian a thu phungin Merseyside club hi a inrempui tawh ang hialin an tarlang a, mahse, Portuguese coach hian tun hnai khan Reds zawm chiang tur anga sawi thawm awm chu a pha.

Amorim hi tun hnai khan, media ṭhenkhat chuan Sporting fan-te chuan league nomawi chawi nge an duh zawk ang amah chelh theih chu, tih an zawt a, kum 39 mi coach chuan, "League nomawi chawi a, an hnehna ka cham bawk hi an duh chu a ni.

"Ka fapa pawhin Lisbon khawpuia awm zel a, league nomawi chawi bawk a duh a, chumi tur chuan min ngen a ni. Tuna pawimawh ber erawh Sporting-in league nomawi kan chawi phawt hi a ni a, chu chu fan-te pawhin an duh a, theihtawp kan chhuah zel ang," a ti.

Amorim kaihhruai Sporting hian Primeira Liga-ah hma an hruai mek a, an hnuai chiaha awm Benfica aiin khelh zat inangah point sarihin an sang zawk mek - league match 29 ve ve an khel tawh a, champion lai Benfica nen hian match nga khelh tur an la hmabak mek.

Player a nih laia Portugal tana vawi 14 inlan tawh Amorim hian kum 2018 khan coaching luhchilh ṭanin, third division club Casa Pia a enkawl a, September 2019 khan third division-a inlan Braga reserve tean enkawl lehin, thla thum hnuah senior team coach atan hlan kai a ni.

Portuguese club vantlang hi Taca da Liga nomawi hial a chawipui a, March 2020 khan Sporting Lisbon a zawm zui. An ram club lar tan hian 2020-21 season-ah Primeira Liga leh Taca da Liga nomawi a chawi a, kum 2021 khan Supertaca Candido de Oliveira nomawi a chawi bawk.

Tun season-ah league nomawi chawi thei dinhmunah an ding mek a, Taca de Portugal-ah final an lut tawh bawk - nomawi pahnih a chawi ngat chuan a hlutna a zual leh ang.