Matic-a'n United zawm lo turin Neves a hrilh!

Manchester United fans tan hriat a nuam vak lo ang - an midfielder hlui Nemanja Matic chuan Red Devils nena sawizawm hlawh mek, Benfica midfielder ṭhangduang Joao Neves chu Old Trafford pan lo turin thurawn a pe.

Kum 19 mi Neves hian tun season inelna hrang hrangah Benfica tan match 50 khelin goal thum a khung a, assist vawi hnih a nei bawk. Portugal tan pawh vawi nga ngawt a inlan tawh a, a kum zat ngaihtuahin sulhnu a nei hraw tawh hle.

Hei vang hian Neves duhtu an tam a, United thawm ring ber mah se, Chelsea leh Liverpool hming pawh sawi rik a ni a, mahse, Matic chuan a club hlui Benfica tana khel mek Neves chu a club hlui tho United zawm lo turin a ti.

Matic chuan, "Neves tan chhuah nan chuan a la hma lutuk hret. Amah chu ni ila, Benfica-ah Champions League khel tur leh puitlin zir zel turin ka cham ang," a ti a, season tharah United-in Champions League an khelh hmel loh avangin Neves hi European football inelna sang berah la inlan ve leh phawt se, a duh.

Serbian midfielder Matic chuan sawi zawmin, "A hun chu a lo la her chhuak ve mai ang tih ka ring a, hmanhmawh a ṭul lo. Joao hian club lian tak tan a khel tawh tih a inhriat a ngai a, Benfica-a a hma hun hi a êng hle. Chhuah nan chuan a la hma hretah ka ngai a, mahse, thutlukna siam tur chu amah a ni," a ti.

Ligue 1 club Lyon tana khel mek Matic chuan Neves hi fak zuiin, "Player danglam tak a ni. Kum 19 mi lek a la ni na a, Benfica hma hun kengtu a ni. Premier League club tam takin an duh tih pawh ka hria a, player naupang tê ni chunga an khel puitling em em si te hi kei chuan ka duh viau zel," a ti a, Neves a fak hle.

Neves hian Benfica-ah contract thar a ziak duh rih lo a, kum 2028 thleng cham turin contract la nei mah se, euro maktaduai 120-a leichhuah theih a nih thu a contract-ah hian a inziak niin khawthlang media-te chuan an tarlang.