Arsenal ngaihven Sudakov a chhuak dawn

Premier League champion tum Arsenal nena sawizawm hlawh tak, Shakhtar Donetsk attacking midfielder Georgiy Sudakov chuan nipui transfer-ah club thar a nei dawn a, he thu hi Shakhtar CEO Sergei Palkin chuan a tichiang tawh.

Sergei Palkin hi London-ah an player chungchanga indawrna kalpui turin a awm mek a, khawthlang media-te chuan Arsenal nen an indawr niin an sawi - Gunners bakah hian Manchester City, Liverpool, Manchester United leh Chelsea te pawhin an duh nia sawi a ni.

Palkin chuan, "Nipui transfer lo thleng se, Sudakov hian European club liante zawm turin chance ṭha tak a nei dawn. Club lian tak tak min rawn bia an awm nual a, ṭhenkhatin direct takin min la dawr chiah lo mah se, an ngaihtuahna an seng tih pawh kan hria. Tun nipuiah European club lian tak a zawm ngei dawn e," a ti.

Ukrainian club hian an player duhlai hi chuti maia man tlawma chhuahtir erawh an tum lo. Shakhtar hian pound maktaduai 60 tal a man atan dawn an inbeisei nia sawi a ni a, January khan Italian club Napoli chuan £34.2mtd-in dawr mah se, an dawrna hi an hnawl a ni.

Palkin chuan, "January-a Napoli-in min dawr lai khan €50mtd (£42.8mtd) min pe ula, a khelh ṭhat dan a zirin bonus awm bawk se, ka ti. Mahse, €40mtd (£34.2mtd) in min dawr a, kan duhna zawta min dawr loh chuan an chân tur thu pawh ka sawi.

"Tunah chuan €50mtd aia tlawmin kan hralh tawh dawn lo. A duhtu club an pun bawk avangin Napoli tan chuan a harsa tawh ang. Amah duhtu zinga a tam zawk hi English club an ni a, ka ngaihdan chuan khawvela midfielder ṭha ber pawl a la ni dawn.

"Ramin indona kan hmachhawn mek avangin a man tlawma lei tuma min dawn lo turin club-te pawh kan ngen. Mudryk kha en ula, kan dinnaah chuan kan ding nghet tlat ania," a ti a, a player chu hralh tlawm a tum loh thu a sawi.

Ukrainian club hian nikum khan Chelsea hnenah Mykhailo Mudryk an hralh a, £88.5mtd lai an tel avangin Sudakov pawh hralh tlawm an tum lo hle. Kum 21 mi attacking midfielder hian tun season inelna hrang hrangah match 28 khela goal sarih khungin, assist vawi thum a nei a, an ram Ukraine tan vawi 12 inlanin goal khat a khung tawh bawk.