Match hnihnaah Nadal chak lo

Rafael Nadal lo kir lehna chuan rei tak a la daih thei rih lo. Nilaini zan Barcelona Open inkhelah Nadal hian Alex de Minaur chu 7-5, 6-1 in a hneh lo a, second round-ah a zinkawng a tawp.

Kum 37 mi Nadal hian a match hmasa zawkah hnehna a lo chang tawh, world number 11 De Minaur erawh tunlai player ṭha zinga mi a nih avangin paltlang ngawt theih a ni ta bik lo.

A inkhelh tlem avanga ranking hniam, tun dinhmuna world number 644 Nadal chuan, "Set khatna ka khel ṭha pangngai viau a, set hnihnaah erawh game khat chauh ka lak avangin ka khel ṭha tawk lo hle tihna a ni.

"Tunah hian ka ṭhat dan takin ka la khel thei lo ngei mai, chutihrualin tournament ka khel leh thei ta hrim hrim pawh hi a lawmawm. Kan hma lawka khelh tur French Open atan pawh beiseina ka nei," tiin a sawi.

Clay court inelna lian French Open chungchang sawi zuiin Nadal chuan, "Ruahman dan chuan Madrid Open ka khel leh ang a, chumi hnuah Rome Open pawh khelh leh ka tum dawn bawk.

"A pui ber chu French Open a ni dawn, clay court inelna lian ka hmachhawn theih nan hian theihtawp ka chhuah dawn a ni, ka tan chuan Paris aia hmun nuam leh thlanawm a awm chuang lo," a ti.