Reece James a lo kir hnai

Chelsea captain Reece James chuan hliam vanga rei tak a chawlh hnuah inkhel tura a lo kir leh hnaih tawh thu social media lamah a tarlang a, tun season-a inlan tawh lo tura ngaih defender hi a inlan leh hman dawn niin a lang.

James hi tun season-ah hliam neuh neuh vangin a inlan tam lo hle a, inelna hrang hrangah match kua chiah a la khel. December khan a malpui hliam vangin zai a ni a, thla hmasa lawk khan Chelsea boss Mauricio Pochettino chuan a defender season chu tawp tawh ang a nih thu a sawi.

Mahse, kum 24 mi defender hian khum aṭanga season hman liam a lo tum bik lo. English defender chuan, "Hun engemaw chen chu ka chawl tawh a, mahse, ka ṭha leh viau tawh e. Zinkawng thui leh harsa tak a ni a, mahse, ka hmaa awm apiang chu ka tawn tlang zel.

"Hma ka sawn deuh deuh a, ka lo kir hnai e. Tun hma zawng aiin hlawhtlin châkin ka tuihal a, ka lo kir ṭep e. Nangni pawh lo inenkawl ṭha ula, kan inhmu thuai dawn nia," tiin a sawi a, khelmual luh a tum leh hnai tawh niin a lang.

Reece James hi lo kir thei pawh ni se, Chelsea tan tun season bikah chuan han phulpui hlutna tur bik a vang rih hle. London club hian beisei angin season an hmang hleithei lo a, Premier League tale-ah pakuana ni mekin, match sarih bak khelh tur an nei tawh lo.

League Cup final-ah Liverpool an ngam lo a, nomawi chawi beiseina erawh an la nei thung. FA Cup-ah semifinal an lut tawh a, Inrinni zan hian Manchester City nen final luh inchuhin an inkhel ang.