Ronaldo-a'n Nou Camp-a thleng e!

Barcelona-in Turin khawpuia Cristiano Ronaldo tel lohna Juventus 2-0 a an hneh khan an lawm uar hret a, twitter lamah, "Juventus, in khelmualah khawvela footballer ropui ber in hmu thei hi kan lawmpui takzet che u a ni," tiin Italian club an fiam zui - he inkhelah hian Lionel Messi chuan penalty aṭangin goal khat a khung. 

Juventus-in Barcelona fiamthu pai dam an harsat a, Italian club hian, "Dictionary dik lo zawk in keu ngei niin a lang a, a dik tak zawk chu Camp Nou-ah kan la rawn hruai ang," tiin Barca an chhang a, Ronaldo hoa Spain-a chak ngei an tum. 

December 8 zan a her chhuak a, Ronaldo telna Juventus-in Nou Camp an thleng a, club pahnihin Champions League last 16 lut chiang tawh mah se an neih ṭhat ve ve an thawhchhuahpui. 

Messi hoa inlan Barcelona-in an mualah goal an khung lo a, Juventus-in khualmualah 3-0 in hnehna an chang - Ronaldo-a'n penalty hmangin goal hnih a khung a, Weston McKennie chuan goal mawi bik a khung bawk. 

Barca-in kum 2016 hnuah Champions League group stage-a tlawm an la nei ngai lo a, mahse, La Liga lamah pawh talbuai tak team hian a duhawm lo zawngin thawnthu an ziah chhunzawm leh ta. 

Minute 13-na lekah Uruguay defender Ronald Araujo chu Ronaldo lakah a foul a, penalty a chawi. Portuguese forward hian goal-a chantir turin harsatna a nei lo. 

Barca an insiamṭha hman lo. Minute sarih a liam a, mikhual team Juve bawkin goal an khung chhunzawm -  American midfielder Weston McKennie chuan mawi zetin bicycle kick hmangin a khung a, he goal luh theih nana Juve ball inpe kual a mawi a, Barca tlarhnung an ṭhiat mawi takzet. 

Nou Camp-ah Barca an zawr a, Juve lamin goal khung an ṭhulh lo thung. Minute 52-naah Clement Lenglet chuan a kuta ball a tawh fuh avangin penalty a chawi a, Ronaldo bawkin goal-ah a chantir - Portuguese forward a taima a, an area lama Messi ball khalh lai thlengin a chuhsak!

Juventus-in khualmualah Barca an hneh a, Catalan club hian Turin-ah 2-0 in hnehna lo chang tawh mah se an pahnih intumnaa goal khung tam zawk Juve chu group G-ah hmahruaitu an ni zui. 

Ronaldo-a'n penalty hmangin goal hnih a khung bawk a, Juve an ngawi mai mai thei lo. Italian club hian, "Kan tiam ang ngeiin footballer ropui ber chu kan lo hruai e," tiin twitter-ah an ziak a, Ronaldo goal khung lawm lai an tarlang bawk. 

Goal thum nen Juve an chak miau a, Ronaldo vs Messi anga inkhel entute pawhin Ronaldo an dah chungnung zawk - mahse, Messi, a bo tawp tihna erawh a ni lo a, Argentine forward hian khel ṭha viau mah se a vanneih zan a ni lo. 

Barcelona-in shot an neih 19 zinga pasarih chiah chu goal zawnah a kal a, target-a shot awm pasarih hi Messi-a shot vek a ni - Barca forward vanneih loh chhan hi Gianluigi Buffon tiin a sawi theih a, kum 42 mi keeper a che ṭha takzet. 

Nou Camp-ah Ronaldo team an chak a, hei vang hian Messi aiin Portuguese forward hi a thiam zawk tihna erawh a ni lo - player pahniha ṭha zawk hi chu inhnialna tawp lo tur a ni a, match khat result hmanga chinfel chi a ni lo. 

Player pahnihin Champions League nomawi an chawi tawh zat belhkhawm ringawt pawh pakua a ni a, he inelnaa an goal khung zat belhkhawm chu goal 252 a ni - ropui zawk hi awlsam taka sawi harsa tak a ni!

Ronaldo leh Messi hi international, Europe leh tualchhung football-ah vawi 36 zet an intawng ta a, Ronaldo-a'n vawi 11 hnehna a channa niin Messi hian vawi 16 hnehna a chang tawh thung. 

Kum 35 mi Ronaldo-a'n goal hnih a khung a, Champions League-a Messi telna club-a hmachhawna goal a khung hmasak ber a ni. 

Barcelona tan Messi bakah Antoine Griezmann chu chance hlauhawm nei a ni a, French forward hian bar a tauh per - Griezmann chuan an chak loh chu coach thiam loh ni loin an thiam loh a nih thu a sawi. 

Season hmasa ṭan dawna Catalan club-a pan hnua beisei phak thei lo forward chuan, "Players a nih loh chuan tu nge dem tur awm? Khelmuala tlan luta inkhel chu keimahni kan ni a, kan thiam loh a ni. Chak duhna, thinlung paukhauh, tlan tam duhna - engmah hi kan nei lo a, engkim kha a chhe em em vek a ni," a ti. 

Barca boss Ronald Koeman chuan, "Kan paukhauh tawk lo. Kan khelh danah kha chuan chak tum ni loin, tlawm loh hram tuma khel kan ang ber. Game control kan tum lo a, kan hlauhthawn hmel em em a ni," tiin a naute khelh danah a lawm lo. 

Juventus hian goal li an khung zawk a, mahse defender Leonardo Bonucci goal khung chu VAR hmanga ennawn a nih hnuah pawmsak a ni lo - Barca mualpho lutuk tur VAR-in a chhan.