Rilru paukhauh Anthony Joshua

Pathianni zinga Kubrat Pulev nena inhnek tur Anthony Joshua chuan a taksa mai ni loin a rilru lam thlenga a inbuatsaih tawh thu a sawi a, "Tun hma zawng ai khan ka rilru puthmang pawh a paukhauh tawh zawk a ni," tiin a sawi. 

Kum 31 mi British fighter hian December 7 khan Saudi Arabia-ah Andy Ruiz Jr chu hnehin IBF, WBA leh WBO kawnghren a lo hloh tawh chu a hlawh let leh a, American boxer-a hneh hnuah erawh a inlan leh tawh lo. 

June 30 khan Joshua hi Pulev nena inhnek tura tih an ni tawh a, mahse, Covid-19 vangin inhnek hun hi sawn a ni. Pulev hi IBF dan anga Joshua hmachhawn tur sa a ni a, October 2017 khan inhnek tura tih an lo ni tawh. 

Mahse, Pulev hi dar hliam vangin a inhnuhdawh a ngai a, tunah erawh an inhnek ngei dawn ta niin a lang. Joshua chuan, "Ka hmaa ding hi ka hmachhawn ngei a ngai si a, thenfai vat a ngai a ni. 

"Boxer hmachhawn hautak tak a ni dawn a, a awlsam lo ang - mualpho leh tawlhthluk theihna tur a ni," tiin a sawi a, "Mipui beisei ang fight kan chhawp theih ka beisei a, hnehna chan ngei ka inbeisei bawk - inhnek en tur mi 1,000 te hnenah an hriat reng tur inhnek chhawpchhuah ka duh a ni," a ti. 

Boxer pahnih inhnekna tur hmun hi Wembley Arena, London, England-ah a ni a, UK sorkarin hri leng vanga inkhuahkhirhna dan a kalpui chu a thlah dul tawh avangin mipui 12,500 lenna stadium-ah hian mipui 1,000-in inhnek an en thei dawn a ni.

Joshua title kawl lai IBF, WBA, WBO leh IBO kawnghren chu boxer pahnih hian an inchuh dawn a, Pulev hi kum 39 mi ni tawh mah se vawi 29 fight-a hmachhawna vawi 28 chak a, vawi khat chiah la tlawm a nih avangin a tawh a khirh dawn. 

Hetihrual hian mipuiin an hmuh châk ber erawh Joshua leh Tyson Fury inhnek a ni a, June khan Joshua promoter Eddie Hearn chuan boxer pahnih tan vawi hnih fight nei turin inremna a awm niin sawi mah se tun thlengin thuthar dang erawh a awm lo. 

Joshua chuan Hearn-a thupuan kha mak a tih thu sawiin, "Tumahin min hrilh ve lo a, a puan hnu lawk aṭangin ka phone chu a ri reng ringawt mai a ni. Fury nen hian in fight dawn ta ila, kawng engkimah fight nghahhlelhawm tak a ni thei. Mahse, fight pahnih an puang a, engmah a thleng lo," a ti!

Fury hi WBC title hlawh chhuak tura a hneh tak Deontay Wilder nen a vawi thum nana inhnek tura tih an ni a, mahse, Wilder hian February-a Fury laka a tlawm ṭum khan British boxer hian a glove-ah hnek nat nan thil sa khat a dah niin a hnuah a puh. 

Kum 32 mi Fury hian Wilder-a puhna hi hrethiam loin American fighter hi a hmachhawn tawh loh tur thu a sawi zui a ni. 

Joshua chuan, "Fury nena inhnek tur anga sawi nih hi chuan awm dan tur hriatthiam a harsa ṭhin. Han ngaihtuah ula, thla thum vel inbuatsaih hnuah, inhnek hma kar hnih velah rawn ṭhulh leh thut ta mai se? Chutiang chu Fury-a mizia a ni a, a harsa a ni. 

"Fury hian a inpeih hunah chuan min zawnna tur a hria a, thu sawi kual duah hi ka thiam dan a ni ve lo. Min hmachhawn a duh a nih chuan amah hmachhawn turin ka inpeih reng tih a hria," tiin Fury a cho hle. 

Fight vawi 24-a hmachhawna vawi 23 chak thei Joshua hian Fury hmachhawn tur chuan Pulev-a hneh leh phawt erawh hna hmasa a ni dawn a, Bulgarian boxer hian hei hi thlentir a tum lo thung!

Pulev chuan, "Anthony tihsual hi vawi tam kan hmu tawh a, a tihsualah a la insiamṭha lo niin ka hmu. A pawimawh ber erawh inhnek ka hmachhawn dan a ni a, ka ṭhat chuan ka  hneh thei tih ka hria a, ṭha leh chak ka intih lai tak a ni. 

"He fight hi keima tan chauh a ni lo a, boxing tan chauh pawh a ni lo - Bulgaria ram pumpui tan a ni. Kan ram aṭangin world heavyweight champion an la awm ngai lo. Joshua nen kan inhnek zawhah hian Fury ka hmachhawn ang. Joshua ka hneh dawn avangin Joshua vs Fury hi chu a thleng dawn lo a ni. Khawvel hian world champion thar a mamawh a, chu chu keimah ka ni," a ti a, Joshua hneha nakkuma Fury hmachhawn ngei a tum. 

Joshua leh Pulev inhnek hun tur hi anni lam sanaah chuan Inrinni zan a ni a, keini tan Pathianni zing dar 4:00 a ni thung - boxer pahnih inhnek hma hian inhnek dang a awm dawn a, hei hi Inrinni zan dar 11:30 aṭangin an ṭan ang.

DAZN lamah pawisa chawiin live streaming hmangin inhnek hi en theih a ni dawn a, thla khata chawi ngai zat hi Rs. 69 a ni.