PSG leh Instanbul inkhel zo lo

10th December, 2020

Thawhlehni zan khan Paris St-Germain-in Parc des Princes-ah Istanbul Basaksehir an mikhual a, chi leh chi inthliarna a awm avangin minute 14-naah inkhel an ti tawp. Nizan dar 11:25 khan minute 14-na aṭangin team pahnih hi an inkhel chhunzawm a, result kan hre hman lo.

Manchester United-in RB Leipzig an hneh loh avangin French champion PSG-in Champions League knockout stage an lut tawh a, group H hmahruaitu ni turin Istanbul an hneh a ṭul ang.

Inkhelh chanchin aiin inkhel chhehvelin ngaihven a hlawh. Instanbul assistant coach Pierre Webo chu mual sira a ṭawng tam avangin hnawhchhuah a ni.

Turkish club hian fourth official Sebastian Coltescu chu ṭawngkam mawi lo hmangah an puh. UEFA chuan thil thlen dan an chhui chian tur thu an sawi.

TV aṭanga a lan danin fourth official hian referee hnenah Webo chu a chet dan avanga hnawhchhuah tur thu a hrilh a, a hrilh dan 'negro' tih a hman avangin Turkish club hian an helh.

Sebastian Coltescu chuan, "Va kal la, midum (black) saw va pe (red card) rawh. A chet dan kha pawm zam theih a ni lo a, saw ti laia midum saw pek tur chu a ni," tiin Romanian ṭawnga referee a hrilh thu a sawi.

Amaherawhchu Chelsea striker hlui Demba Ba chuan, "Engvanin nge fourth official khan 'negro' tih a hman?," tiin thinrim takin vawi hnih a sawi a, hemi hnu hian Ba chuan, "Midum (black) chungchang hi sawi chuan midum i ti tur a ni," tiin Coltescu bulah a sawi leh bawk.

Basaksehir player lung-awi lo hian khelmual an chhuahsan a, PSG player-ten an zui. UEFA chuan, "Club pahnih nena inbiak hnuah inkhelh hmabak hi naktukah khelh ṭhat ṭha kan ti a, official hrang hlak hman an ni ang," tiin thuchhuah an siam.

PSG forward Kylian Mbappe chuan, "Chi leh chi inthliarna kan duh lo, Webo i lamah kan ṭang," tiin twitter-ah a ziak. Turkey president Recep Tayyip Erdogan pawhin UEFA chu hma la turin a ngen.

Social media lamah erawh Romanian ho hian 'negro' tih hi ṭawngkam tuallengah an ngai a, inhmuhsitnaah an ngai lo. Instanbul assistant coach Pierre Webo leh midum dang hian a bawp lawk zawngin an laah an ngai.