Tottenham tan chak a la ngai

Zaninah Europa League group stage dinhmun chinfel a ni dawn a, tlang chiang tawh mah se Tottenham Hotspur tan group J hmahruaitu ni tur chuan chak a la ngai - an chunga awm Royal Antwerp nen dar 1:30-ah an intawng ang.

Group match vawi nga an khelh tawh chinah Arsenal chu chak vek thei awmchhun an ni. Gunners hian zanin dar 11:25 hian Dundalk an lenchilh thung ang - North London Derby a mualpho hlim tan insiamṭhatna hun a ni dawn.

Group hmahruaitu nih loh chuan last 32 draw neih a nih hnuah group danga hmahruaitu an hmachhawn a ngai dawn. Pahnihna ni tan Champions League aṭanga tla hlim sut nghal theih a nih bawk avangin a chung bera awm a pawimawh.

Spurs hian nomawi an duh avangin Jose Mourinho an ruai a, Portuguese manager hian an duh tih hlawhtlinsak ngei a tum. An match hmasa lamah pawh a ṭul a nih chuan a player neih ṭhat a chhawr hreh lo, zaninah pawh a ngaihdan a thlak thut a rinawm loh.

Real Madrid aṭanga an hawh let Gareth Bale tan Mourinho hmin theihna hun a ni ang. Bale hian beisei a la phak rih lo - Premier League lama khelh phak a duh a nih chuan Europa League lamah a chet ṭhat hmasak a ngaih hmel.

Dele Alli leh Lucas Moura te pawhin hun ṭha an nei ang. League lama chhawr rim leh rinrawl ni bawk Harry Kane, Son Heung-min leh Pierre-Emile Hojbjerg te erawhin hahchawlhna hun an neih ve thung a rinawm.

Group F hmahruaitu chu Napoli an ni a, point 10 an nei. Italian club hian pahnihna dinhmun luahtu Real Sociedad an mikhual dawn a, team pahnih inthlauhna hi point hnih chauh a nih avangin an dinhmun a la inthlak thleng hlawk thei.

Team pahnih chauh an inel lo, pathumna AZ pawhin Sociedad angin point riat ve tho an nei mek - anni hian beisei nei tawh lo Rijeka an hmachhawn thung ang. Group F-ah hian pakhatna ni lai pawh an dinhmun a la him bik lo tihna a ni.

AZ an chak a nih a, inkhel dangah Sociedad an chak bawk chuan an pahnihin an tlang dawn. A chung bera awm Napoli chu pathumnaah awmin an tla daih thei tihna a ni. Chutihrualin Gennaro Gattuso naute tan tlang turin point khat chauh hmuh belh pawh a tawk thung.

Gattuso chuan, "Serie A match hnuhnung berah Crotone 4-0 in kan sawp thei, khami ṭuma inlan ka naute kha zanin atan pawh an inkhelh theih dawn avangin beisei kan nei sang. Ka sawi tawh ṭhin ang khan ṭha taka kan khelhna ang kha chhunzawm kan tum," a ti.

Europa League-ah a zawnin match nga an chak a, an sulhnu a chhe lo. Mahse Arsenal hian Premier League lamah kum tam tak hnuah season an ṭan chhiat ber ṭum an tawng a, fans an lungawi thei chuang lo.

Mikel Arteta naute hi Spurs laka mualpho hlim an ni, zaninah tling chiang tawh chungin Dundalk an lenchilh dawn. Ireland club hian beisei an nei tawh lo a, player langsar lo zawk deuhte chhawr chung pawhin Gunners hi chak tura rinkai an ni.

Team pahnih an intawn ṭumin North London club hian 3-0 in hnehna an chang. Emirates Stadium-a inkhelah striker Eddie Nketiah, midfielder Joe Willock leh Nicolas Pepe ten goal an khung, zaninah pawh anni pathum hi an inlan leh a rinawm.

Arsenal defender Rob Holding chuan, "Hun harsa kan tawng mek a, tumah ngaihdan leh thil tum hrang nei loa kan ṭanrual a ngai. Theihtawp kan chhuah a nih chuan kan tho chhuak thei em em ang," tiin a sawi.