FA Cup semifinal Man City Vs Chelsea; Coventry Vs Man United

Khawvel inelna upa ber FA Cup-ah team pali chauh an dam tawh a, tun kartawp hian Wembley Stadium-ah semifinal khelh a ni dawn. Zanin dar 9:45 hian champion lai Manchester City-in Chelsea an hmachhawn ang a; April 21, Pathianni zan dar 8:00-ah Coventry City leh Manchester United te an inkhel ve leh ang.

Pep Guardiola hoten Champions League quarterfinal-ah Real Madrid an hneh loh avangin an treble champion nawn thei dawn ta lo a, chutihrualin City hian double champion an la tum dawn. An khingpui tur Chelsea hian match hnuhnung berah Everton 6-0 in an sawp a, Mauricio Pochettino hote tan infuihphurna ṭha tak a ni.

City, harh rawh!

Man City-in Real Madrid nen minute 120 an khel a, inkhel thunun zawk mah se an goal khung zat a inan avangin penalty shootout hmangin chak zawk zawn a ngai a, an vanduai ta zawk. Pep Guardiola hote hian FA Cup semifinal an khelh nghal dawn avangin puan ven an sawi chhing nghal a ṭul.

Real lakah City-in corner kick vawi 18 an hmu a, Spanish club tlarhnung an tibuai zo lo. Set piece coach Carlos Vicens-a sawiseltu pawh an ṭhahnem a, FA Cup semifinal-ah insiamṭhat an tum ang.

Inkhel a zawn deuh avangin Pep Guardiola-a'n squad a siksawi ngei a rinawm a, bul ṭan tur zingah Jeremy Doku, Julian Alvarez, John Stones leh Stefan Ortega te an tel a nih pawhin a mak hran lo ang.

Chutihrualin inkhel pawimawh a ni a, Kevin de Bruyne, Rodri leh Phil Foden ten bul an ṭan ngei a rinawm. Hriat tel atana ṭha erawh KDB hi Erling Haaland nen Real Madrid lakah an khelh tluan theih loh avangin extra time-ah an thlak. Player ṭha pahnih hi bench-ah an ṭhu ta zawk a nih pawhin goal mamawh dan a zirin second half lamah chuan an lut ngei ang.

Hei le, hun ṭha

Chelsea-in season an hmang ṭha lo a, chutihrualin FA Cup-a an champion a nih chuan Poch-a hote hian season a hmang ṭha tih a ni tawh thung dawn. Blues-in an tihfuh ber chu Man City aṭanga Cole Palmer an la lut hi a ni a, English midfielder hian a club hlui hmachhawn a châk tawh khawp ang.

Kum 21 mi Palmer hian tun season Premier League-ah goal 20 khungin assist vawi kua a nei a, Haaland nen an goal khung a inzat hial. FA Cup semifinal-ah pawh Palmer hi en bik tur a ni.

Man City-in darkar 48 chiah chawlhna hun an nei a, Chelsea erawhin hahdamna hun an nei ṭha. Hei vang hian Poch-a leh a hote tan tun hi City hnehna hun ṭha a ni.

Mahse maw, Chelsea hian hliam an la ngah. Robert Sanchez, Raheem Sterling, Enzo Fernandez leh Axel Disasi te dinhmun a chiang lo a, player pawimawh dang Christopher Nkunku, Reece James, Levi Colwil leh Wesley Fofana te an chhawr thei lo ang.

Blues hian tun season-ah Man City hi vawi khat chiah an la hmachhawn a, Etihad Stadium-ah 1-1 in an inhnehtawk. Pep-a hote hi rinkai zawk la ni cheu mah se an inkhelh tawhna thlirin chesual thei an ni a, penalty shootout a thleng nawn lo ang tih pawh a sawi theih loh.

Final a chiang?

Football-ah chuan eng result pawh thleng thei a ni a, chutihrualin Manchester United-in Coventry City an hneh thei lo a nih chuan club neitu tharten Erik Ten Hag chungah rinna an nghat ngam kher lo ang.

Man United hian match li chhung chu chak hmel an hmu tawh lo a, Premier League-ah point 12 hmuh theih aṭangin point thum chauh an hmu. Ten Hag-a hoten insiamṭhat an mamawh takzet a, nomawi beiseina chhi nung turin Coventry City an hneh a ṭul bawk.

Bournemouth lakah rawlthar defender Willy Kambwala a talbuai nasa a; Jonny Evans, Victor Lindelof, Lisandro Martinez leh Raphael Varane te an inhliam avangin Kambwala hi Harry Maguire nen an inkawp leh ngei a rinawm.

United khingpui tur Coventry hi tun hnaiah an che ṭha bik lo. Championship-a an match hnuhnung pahnihah an chak lo ve ve a, table-ah pawh pariatnaah an awm mek. Coventry tan Ellis Simms (18 goals) leh Haji Wright (17) ten tun season inelna hrang hrangah goal an khung tam a, United tlarhnung tan pawh ven uluk a ṭul ang.