Arsenal an tho chhuak thei ang em?

Arsenal-in Premier League-ah chauh nomawi beiseina an nei tawh. Zanin dar 12:00 hian Mikel Areteta leh a hoten Molineux Stadium-ah Wolverhampton Wanderers an hmachhawn ang. Gunners hian hnehna an chang a nih chuan Manchester City aia match khata khel tamin league hmahruaitu an ni thei ang.

Zanin inkhel tur hi Arsenal tan a pawimawh takzet. Arteta hote hian kar liam ta khan Aston Villa an hneh lo a, mi ṭhahnem tak chuan nomawi an thlauhah an ngai hial. Harsatna belhchhah turin Champions League-ah ṭum danga an ngam loh ṭhin Bayern Munich hneh loin an tla a, Europe-a nomawi beiseina a tawp nghal.

Premier League-ah erawh nomawi beiseina a la tawp lo a, match ruk khelh tur a la awm a, engpawh thleng thei a la ni. Chutihrualin Wolves lakah hian Gunners hi an tho chhuak lo a, point an hloh a nih ngat chuan season thar an nghah leh a ngai dawn.

Gunners hian Wolves hi an ngam a, an intawn hnuhnung pangaah an hneh vek a, an intawn hnuhnung match 32-ah goal an khung vek bawk. London club hi match hnuhnung pahnihah chak lo mah se an khingpui tur Wolves record a chhe zawk. Gary O'Neil hote hian match hnuhnung paliah chak hmel an hmu lo.

Arsenal chairman hlui Sir Chips Keswick chu April 17, Nilaini khan kum 84 mi niin a thi a, June 2013 - May 2020 chhung khan Chairman hna a chelh. Arteta leh a hoten point thum an mamawh bakah Chips Keswick puala hnehna chan ngei an tum ang.