Liverpool tan nomawi pakhat a liam leh ta

April 7, Pathianni zana Manchester United an lenchilh hma khan Premier League table chung berah Liverpool an awm a, anmahni hnaih bertu Arsenal aiin point hnihin an sang zawk.

Europa League quarterfinal-a Atalanta hmachhawn an la hmabak bawk a, FA Cup semifinal lut zo lo mah se League Cup champion Reds tan an hmaah nomawi pahnih lak belh tur a la awm a, chance pawh a ṭha hle.

Mahse, engkim her danglam turin kum chu sawi loh, thla pawh a vei a ngai lo. Ni 12 a liam leh meuh chuan Premier League hmahruaitu Manchester City chu Liverpool-in point hnihin an phak lo a, Europa League quarterfinal aṭangin petchhuah an ni ta bawk.

Reds hian Ningani zan khan Europa League quarterfinal second leg-ah Atalanta an lenchilh a, 1-0 in hnehna chang mah se, first leg-ah 3-0 ngawta an lo tlawm tawh avangin 3-1 in an tla.

Beiseina

Atalanta lakah 3-0 ngawtin hnufual sa mah se, Liverpool ṭantuten beiseina an nei tlat a, Italian club lakah an comeback theih an beisei tlat - an demawm loh, November 2020 khan Atalanta khelmualah 5-0 in an chak tawh miau a!

Reds ṭantute beiseina chhi nung turin Liverpool-in goal an khung hma a, Trent Alexander-Arnold-a ball cross chu penalty area-ah khawih fuh a nih hnuah Merseyside club hian penalty an hmu.

Mohamed Salah chuan penalty hi goal-ah a chantir a, kum 31 mi forward hian tun season inelna hrang hrangah match 38 khelin goal 24 a khung leh der tawh a, assist vawi 13 a nei tawh bawk.

Salah-a'n goal a khung hma avangin Liverpool fans an lawm a, an team an 'comeback' ngei rinna a lian hman hle. Mahse, Liverpool-in first half chhungin goal dang an khung zui lo a, 1-0 in chawlhlawk an hmang.

A thlawn mai maw

Goal an khung hma avangin Liverpool fan-te lawm hman viau mah se goal khung an harsat zui a, second half-ah pawh thawnthu a danglam tam lo - second half chhung zawngin vawi hnih chiah shot an nei!

Klopp-a'n chak a duh tih pholangin, minute 25 la awmah Darwin Nunez, Diogo Jota leh Harvey Elliott te a luhtir a, mahse, an chak loh apianga Reds fan-ten, "Inhliam lo se aw..." an tih ṭhin Jota pawhin a dam hnuah Liverpool a la chhan thei lo.

Liverpool tan first half tawp hma hreta Salah-a'n a chance neih ṭhat lutuk a khung lohte chu uiawm a tling a, khung ngat se, inkhel thawnthu tidanglam thei tur a ni.

A tawpah chuan Liverpool-in an goal khung theih loh an tuar a, an hneh ngei tura ngaih Italian club lakah tlawmin, nomawi pakhat chu an thlah liam leh ta. Inkhelh zawhah Reds manager Jurgen Klopp chuan, "League lamah kan insawrbing ang," a ti.

Hmabak chu

Liverpool-in an neih sa League Cup piahlama an beisei theih chu Premier League chiah a ni ta a, hei pawh a harsa dawn - Pathianni zan dar 9:00 hian Fulham an lenchilh ang a, Nilaini zanah Everton hmachhawn zuiin, April 27, Inrinniah West Ham an tlawh leh ang.

Reds hian khualmualah a zawnin league match thum an khel dawn tihna a ni a, ni kaw chhunga khelh tur a nih avangin a awlsam lo ang - Jurgen Klopp leh a naute tana lawmna tur erawh Manchester City inlan leh hmain league match hnih an khel hman dawn.

Liverpool hian league match hnihah hian hnehna an chan chuan City hi point liin an tlansan hman dawn tihna a ni a, Pep Guardiola team tan pressure a na sawt ang. Hetihlai hian Arsenal an la awm bawk tih hriat a ṭha.

Gunners hi Liverpool nen an point hmuh zat a inang mek a, mahse, an hmabak a awlsam bik lo. Zanin dar 12 hian Wolverhampton Wanderers chu khualmualah an lenchilh ang a, Thawhlehni zanah Chelsea mikhual zuiin, April 28 zanah Tottenham Hotspur an lenchilh ang.