El Clasico hun a thleng leh ta - a pawimawh dawn

Spanish football mai ni lo, football khawvela club langsar pawla chhal ngam chu Real Madrid leh Barcelona an ni a, 'El Clasico' tih a rik tawh chuan football khawvelin Spain lam a hawi thuai ṭhin.

Lionel Messi leh Cristiano Ronaldo awm lai ang em chuan ngaihven hlawh lo mah se, a bik takin Spanish football ngainatute thin phu chu he match hian a la tirang reng mai!

Chutiang taka inkhel boruak sang leh ngaihven hlawh chu Pathianni dar 12:30 hian khelh a ni dawn a, La Liga match pawimawhah Real Madrid chuan Barcelona an mikhual dawn - Spain a chawl ṭhuap dawn.

La Liga match sarih chiah khelh tur awm tawhah Real hian point 78 hmuin hma an hruai mek a, an hnuai chiaha awm Barca aiin point riat ngawtin an la sang mek. Champion beiseina la thi lo Barca-in an inkar sawr zim a, Real pressure pek an duh - a hmuhnawm loh ring lo la.

Mualphona

Barca boss Xavi-a'n kumtir khan Catalan club a chhuahsan tur thu a sawi a, mahse, result ṭha a neihpui zui avangin club thuneituten chelh dan an ngaihtuah. Hetiang a nih lai tak hian Champions League-ah an chesual zui.

Club lian ve tawk taka inngai Barca hian Champions League quarterfinal first leg-a 3-2 a an hneh hnu Paris Saint-Germain chu 4-1 ngawtin mahni mualah an ngam lo a, Xavi chelh duhtuten an rilru an thlak leh tawh mai thei!

Barca mualphona belhchhahtu chu, "Xavi aiin Barca nihphung ka pholang ṭha zawk," titu, an coach hlui Luis Enrique enkawl PSG an ngam lo hi a ni a, 'phatsantu' ti hiala an koh Ousmane Dembélé-a'n goal a khung lehzel pawh a runthlak.

He mualphona nasa tak ata tal chhuak turin Barca-in nomawi an mamawh a, chumi an beisei theihna awmchhun chu La Liga chauh a ni ta - Real Madrid hneh chunga beiseina thar an insiam a nih chuan Xavi tan pawh a hmingchhe lutuk tur thup mawina remchang a ni ang.

Real an danglam

Barca an mualpho laiin Real erawhin club lian zia an chhuah chhunzawm zel a, Champions League semifinal an lut leh der tawh - quarterfinal-a an hneh lah Pep Guardiola enkawl Manchester City an ni.

Carlo Ancelotti leh a nauten tun season-ah league leh Champions League nomawi chawi kawp theihna remchang an nei mek a, 'King Carlo' tih meuha fan-ten hming lem an pek Coach hian awlsam taka an hun ṭha neih hi thlah a duh dawn lo.

Tun season La Liga-ah Barca leh Real hi vawi khat an intawng tawh a, Barcelona khelmualah 2-1 in Real an chak. Spanish Super Cup final-ah Real hian 4-1 in Barca hi an sawp leh a, Catalan club tan league season khata vawi hnih ngawt Real ngam loh a tlawm thlak dawn.

Thil mak danglam ve angreng tak chu tun season league match 31 an khelha vawi thum tlawm tawh Barca hi an tlawmna match thumah hian anmahni mualah vek an tlawm a, khualmualah tlawm an la nei lo.

Real an ṭha

Real tan City lakah Vinicius Jr chu lakchhuah a ngai a, Brazilian forward hi Pathianni zana a inlan theih dawn leh dawn loh a la chiang lo a, Madrid khaw club tan chuti taka lungphanna tur erawh a ni lo.

Kum 20 mi lek ni chungin Jude Bellingham hi innghahna tlak a nihzia kan hmu tawh a, inelna hrang hrangah match 35 khela goal 20 khung tawhin, assist vawi 10 a nei mek - match 44-a goal 17 leh assist vawi riat neitu Rodrygo a la awm bawk.

A tawi zawnga sawi chuan Barca tlarhnungin hna an ngah dawn tih a chiang a, inthlahdah a thiang lo. Midfielder Aurélien Tchouaméni pawhin hrem a nihna a tuar zo tawh a, rei tak chawl tawh David Alaba leh Thibaut Courtois chu inlan lo tur chiang an ni.

Real hian Barca an hneh chuan point 11 ngawtin league-ah an sang fal tawh dawn a, match ruk chiah khelh hmabak a awm zui dawn bawk avangin champion hlado pawh ngaihngam takin an chham ngam tawh hial ang.

Barca hi

Catalan club-in tlarhmaah Robert Lewandowski an nei a, mahse, Polish striker hi kum 35 mi a nih ve tawh avangin kan hriat ṭhin Lewy kha a ni tawh bik lo - tun season-a match 42 a khelh tawhah goal 20 leh assist vawi kua a la nei tih erawh hriatsak ila.

Raphinha hi Barca a pan hnuah a ṭha tawlh tawlh emaw tih mai tur a ni a, tun season-a match 32 a khelhah goal kua khungin, assist vawi 10 a nei tawh a, Real-in Brazilian forward hi an ngaihsak lo a nih chuan an tisual ang.

Atletico Madrid aṭanga loan-a an hawh Joao Felix pawh hi rilru sen telna chi tak a ni a, midfielder Ilkay Gundogan hian treble champion meuh City chhuahsanin Barca a pan a ni a, nomawi chawi loa season a khar chuan a ui dawn.

Catalan club tan hrem vanga an chawlh hnuah Andreas Christensen leh Sergi Roberto chu inlan thei dinhmunah an ding leh tawh bawk a, Santiago Bernabeu-ah chak châk takin an leng ang - Pathianni zan chu men rei lo inpeih phawt mai rawh!