Rossi-a 'Roma' an vul zel

Daniele de Rossi enkawl AS Roma-in kawng dik an zawh zel a, Europa League semifinal lut turin AC Milan chu 2-1 in an hneh - team pahnih intawn hmasakah 1-0 in Roma hi an lo chak tawh bawk a, inkhel pahnih belhkhawmah 3-1 in an chak a ni.

Stadio Olimpico-a inkhelah Roma tan Gianluca Mancini leh Paulo Dybala ten minute 12 chhungin goal khat ve ve an khung hman a, 2-0 a ni der.

Mahse, Rafael Leao laka a chet dan hlauhawm tak avangin Mehmet Zeki Celik chu hnawhchhuah zui a ni a, goal hnih khungtu Roma-in player 10-in an khel zui.

Milan-in a tam zawk an nih an chhawr lawk thei lo a, minute 85-naah Matteo Gabbia chuan si phurh sut ṭhenin, an goal khung a tlai hret a, comeback nan hun a awm tawh lo a, an tlawm.

Roma tan chanchin lawmawm lo pakhat a awm a, minute 28-naah hliam vangin striker Romelu Lukaku lakchhuah a ngai a, ACL hliam vanga chawl reng Tammy Abraham chuan a thlak. Lukaku lo kir hun tur hi he thu buatsaih a nih lai hian chiang taka sawi a la awm rih lo.

Serie A table-a pangana ni mek Roma hi De Rossi enkawlna hnuaiah an indinthar mek a, league table-ah pawh pangana ni leh tawhin, season thara Champions League khelh an la beisei.

Thawhṭanni zan dar 10:00 hian palina ni mek Bologna chu league match-ah an mikhual dawn a, an hneh chuan khelh zat inangah point khat chiahin Bologna an phak lo tawh dawn.

Roma hian an coach Jose Mourinho an ban hnuah De Rossi hi January khan an coach ni turin an la lut a, season tawp thleng atan bak contract an ziahpui lo. Mahse, an beisei aia result ṭha a neihpui avangin season tharah pawh a la cham dawn tih an sawi chiang tawh.

Kum 40 mi Rossi hnuaia an league match hnuhnung pasarihah an tlawm tawh lo a, Rossi-a'n a zawm tirha table-a pakuana team hi tunah chuan pangana an ni ta - Europa League semifinal an lut bawk.