ISL: Semifinal luh inchuh Goa leh Chennaiyin
India rama club football inelna sang ber Indian Super League playoff-ah zanin dar 7:30 hian hian FC Goa chuan Chennaiyin an mikhual dawn a, semifinal luh an inchuh dawn.
Mizo zingah chuan Jeje Lalpekhlua vang ringawt pawhin Chennaiyin hian hriat an hlawh a, mahse, tun season-ah erawh South Indian club hian Mizoram player kawl an nei lo.
FC Goa hian Dinthar tlangval Ayush Chhetri an kawl thung a, Aizawl FC chhulchhuak Ayush hi a kum a la nau deuh avangin zanin inkhel boruak sangah a inlan dawn leh dawn loh sawi chian theih a la ni rih lo.
Goa an ṭha
Manolo Márquez enkawlna hnuaiah FC Goa-in season duhawm tak an hmang a, league match 22-ah vawi 13 hnehna changin, vawi ruk draw an nei a, vawi thum chiah an tlawm - Mumbai City nen league round-a tlawm tlem ber an ni.
Morocco tana vawi li inlan tawh Noah Sadaoui hi tlarhmaah innghahna a ni leh dawn a, league match 20-ah goal 10 khungin, assist vawi nga a nei. Goal 10 leh assist vawi hnih nei tawh Carlos Martinez pawh ven bik a sual lo ang.
Irish defensive midfielder Carl McHugh lam hmaih a thiang lo. Scottish Premiership-a Motherwell captain ni thei hian Mohun Bagan lamah tawnhriat a lo nei ṭha tawh bawk a, Indian football-ah a mikhual lo hle.
Chennai an inpeih
League table aṭanga thlirin Chennaiyin-in rin an hlawh lo zawk a, an league match hnuhnung berah FC Goa hian 4-1 ngawtin an sawp bawk. Mahse, South Indian club hi an zam phah lo.
Chennaiyin boss Owen Coyle chuan, "He hmunah hian kan kir leh a nih chuan, inpeih takin kan lo kir ang," tiin Goa hi a vau lawk a, kha inkhelah khan team pahnihin an neih ṭhat ber an thawhchhuahpui loh ve ve avangin team pahnih teh nan a tling tawk lo.
South Indian club tan chak turin Australian striker Jordan Murray leh Scottish striker Connor Shields chet ṭhat a ṭul a, tun season-a goal li leh assist vawi sarih nei tawh attacking midfielder Rafael Crivellaro pawh theihnghilh loh a ṭha.
Thawnthu hlui
FC Goa-in ISL-ah playoff match 14 zet khel tawhin, anni aia khel tam an la awm lo - heng zinga match ngaah hian Chennaiyin an hmachhawn a, Goan club hian vawi khat chiah hnehna an chang ve!
Goa hian league winners shield-te meuh pawh lo dawng tawh mah se, ISL nomawi erawh an la chawi ngai miah lo a, Spanish coach ṭha Manolo Márquez hoin an tawn ngai loh thawnthu thar ziah hi an châk khawpin a rinawm.
Chennaiyin erawh ISL nomawi vawi hnih lo chawi tawh an ni a, an champion ṭum hian Mizo legend Jeje a khel ve ve - vawi khat final an thleng tawh bawk a, ISL-ah Goa aiin an record a ṭha zawk.