WTA Player of the Year atan Sofia Kenin

Hmeichhe tennis thuneitu sang Women’s Tennis Association chuan season liam ta atana chawimawina a sem a, American nula Sofia Kenin chu WTA Player of the Year atan thlan a ni.

Kenin hian season tir lama khelh ṭhin Australian Open nomawi a chawi. A Grand Slam title hmasa ber la tur hian semifinal-ah world number 1 Ashleigh Barty a hneh a, nomawi inchuhna inkhelah major title pahnih la tawh Garbine Muguruza a hneh leh bawk.

Kum 22 mi Kenin hi American player zinga WTA Player of the Year chawimawina dawng thei pariatna a ni. Ani hma hian Serena Williams, Martina Navratilova, Lindsay Davenport, Tracy Austin, Chris Evert, Venus Williams leh Jennifer Capriati ten an dawng tawh.

French Open final-ah erawh Kenin hian Iga Swiatek a ngam lo. Polish player zinga Grand Slam la thei hmasa ber Swiatek hi Most Improved Player of the Year atan thlan a ni ve thung.

World number 1 hlui, hun rei tak a inkhelh loh hnua Western & Southern Open champion ni thei Victoria Azarenka chu Comeback Player of the Year atan thlan a ni. Belarus star hi world ranking lamah pawh a sang zual 20 zingah a inhlangkai thei a ni.