Leverkusen an tlawm thei lo!

Bundesliga nomawi chawitu Xabi Alonso leh a naute an tlawm thei lo - Europa League quarterfinal second leg-ah Leverkusen hian West Ham chu 1-1 in an inhnehtawkpui a, first leg nena belhkhawmin German club hi 3-1 in an chak.

West Ham tan Michail Antonio chuan minute 13-naah goal hmahruai a khung a, beiseina a sang hman viau. Mahse, Hammers hian goal dang an khung zui thei lo a, minute 89-naah Jeremie Frimpong chuan Leverkusen tan khung ve lehin, 1-1 in an ṭin a, Alonso-a team-ten semifinal an lut.

An tlawm dawn emaw tih hnuah Leverkusen-in hun tawp dawnah goal an khung leh hram a, May 27, 2023-a VfL Bochum laka 3-0 a an tlawm hnuah an tlawm leh tawh lo - tun season-ah tlawm an la nei miah lo tihna a ni.

Leverkusen hian league match 29-ah tlawm nei loin league nomawi an chawi a, German Cup-ah final an lut tawh a, Europa League match 10 an khelh tawhah tlawm nei miah loin a thiam pali zingah an tel thei bawk.

German club hian Bundesliga bakah Europa League leh German Cup nomawi an chawi tel thei a nih chuan hriat an hlawh rei khawp ang - Europa League semifinal-a an tawn tur erawh AS Roma an ni a, en a châkawm tawh hle.