Nagelsmann-a'n contract a pawtsei

Germany manager Julian Nagelsmann chuan a contract neih lai chu World Cup 2026 thleng daih turin a pawtsei. Kum 36 mi Nagelsmann hi September 2023 khan Germany Manager atan lak a ni a, Hansi Flick a thlak.

Inremna hmasaah Nagelsmann contract hi Euro 2024 zawh ruala zo tur a ni a, coach theihna sang tak a nih avangin club lian tak tak nena sawizawm a ni a, chung zingah chuan Bayern Munich pawh an tel.

Kum 36 mi Nagelsmann chuan, "Thutlukna hi thinlung aṭanga chhuak a ni a, ram team enkawl hi chawimawina a tling," tiin a sawi. Nagelsmann-a hnuaiah Germany hian match ruk khel tawhin vawi thum an chak a, March thla khan France leh Netherlands an hneh avangin Euro 2024 atan pawh an phur thar hle.

Euro 2024-ah Germany hi Scotland, Hungary leh Switzerland te nen group khatah an awm ho a, kum 2016 aṭang khan inelna lian thamah Germany hian last 16 an kal pel lo.

German Football Association president Bernd Neuendorf chuan, "Europe club lian ṭhahnem takin an ngaihven lai a, DFB leh Nagelsmann ten inremna kan nei thei hian kan hmabak inelnaah beiseina kan nei sang tih a pholang," tiin a sawi.