Villa hero - yellow card vawi 2 hmutu Martinez

Europa Conference League quarterfinal-ah Aston Villa chuan penalty shootout hmangin French club Lille an hneh a, semifinal an lut. Villa hian semifinal-ah Fenerbahce hnehtu Olympiacos an hmachhawn ang.

Inkhel dangah Fiorentina-in Victoria Plzen 2 - 0 in an hneh a, Club Brugge-in PAOK 2-0 thoin an hneh bawk. Fiorentina leh Club Brugge te hi semifinal-ah an inhmachhawn dawn.

Inkhel a nung

Villa-in an mualah Lille 2-1 in an hneh tawh a, French club hian Premier League match hnuhnung bera Arsenal hnehtu hi an hlau bik lo. Stade Pierre-Mauroy-a inkhelah Yusuf Yazici chuan minute 15-na lekah goal ṭha zetin a khung nghal.

French club an khel ṭha chhunzawm a, English club aiin goal hlauhawm an ngah zawk. Minute 67-naah Benjamin Andre-a'n nalh zetin a tauh lut a, keeper Emiliano Martinez tan dan ngaihna a awm lo. Lille-in 2-0 in hma an hruai a, agg-ah pawh 3-2 in an hma an hruai ta bawk.

Unai Emery kaihhruai Villa-in tlawm an tum lo a, hun tawp lamah an nawr na hle. Matty Cash-a'n minute 87-naah si phurh a sut a, 2-1 in inkhel a tawp. Agg-ah 3-3 a nih avangin extra time khelh a ni a, goal a luh belh tawh lo.

Martinez-a show

Villa-in penalty an pet hmasa a, Youri Tielemans-a'n a khung nghal. Argentine keeper Martinez-a'n Lille tana pet hmasa ber Nabil Bentaleb pet a dansak a, mipui a lam khum zui bawk.

A chet dan mawi loh avangin Martinez hi referee Ivan Kruzliak-a'n yellow card a pe a, yellow card vawi hnihna a nih tawh avangin hnawhchhuah turah an ngai vek.

Mahse, football danah chuan, "Inkhelh hun pangngaia yellow card leh warning chu penalty shootout-ah chhiar tel a ni tawh lo. Chutihrualin hun pangngaia red card hmu chu an tel thei tawh lo," tih a inziak.

Martinez a vannei a, Villa tan hero a ni zui bawk. Lille tana pettu dang Jonathan David, Angel Gomes leh Remy Cabella ten an khung a, Villa tan Ollie Watkins, Cash leh Douglas Luiz ten khung mah se Leon Bailey-a'n a khung lo.

Hun pawimawhah Martinez a inlar a, Lille tana panganaa pettu Benjamin Andre pet chu dansakin Villa an chak. Penalty shootout-ah Martinez hian record a nei ṭha hle. FIFA World Cup Argentina tan khelin penalty shootout hmangin quarterfinal leh final-ah Netherlands leh France te an hneh. Hemi hma hian Copa America semifinal-ah Colombia an hneh a, Arsenal tana a khelh laiin Community Shield-ah Liverpool an hneh bawk.