City an tho, Chelsea an vanduai

Champions League aṭanga tla Manchester City an tho chhuak nghal a, FA Cup semifinal-ah Chelsea 1-0 a hnehin final an lut. April 20, Inrinni zan inkhelah Real Madrid laka penalty hlahtu Bernardo Silva-a'n goal awmchhun a khung.

UCL leh FA Cup inkhel inkarah chawlhna hun a tam lo a, Pep Guardiola hoten an tuar. Man City-in ball chang tam zawk mah se Chelsea-in goal chance an nei ṭha a, Mauricio Pochettino hote an vanduaiah a ngaih theih.

Vanduaina chu

Wembley Stadium-ah Nicholas Jackson a langsar a, a lansarh chhan erawh chance ṭha a hlah vang a ni. Jackson hian minute nga pawh tling loah chance a nei nghal a, goalkeeper Stefan Ortega zawnah a pet.

Second half ṭantirhah Conor Gallagher ball pek ṭha chu Jackson-a'n um lutin goalkeeper chauh hmasawn mah se keeper Ortega-a'n a dang. Hemi aṭang hian Blues hian nawr zuiin Cole Palmer-a cross ball duhthusam chu Jackson hnai tak aṭangin a tauh lut thei lo!

Minute 55-naah Palmer-a freekick pet chu wall-a ding Jack Grealish-a'n a kutin a dan sak a, English midfielder hi box chhungah a awm. Chelsea-in penalty-ah ngai mah se VAR-in penalty ni turah a ngai lo.

Penalty an hmuh loh avangin Chelsea an vanduai a, an tlarhma hriam tawk loh chu an chak loh chhanah a ngaih theih bawk. Jackson-a vanneih zan a ni lo a, a hun ṭha dang neih pawh Kyle Walker a paltlang theih loh avangin engmah loah a chantir.

City nge nge

Man City-in hliam vangin Erling Haaland an chhawr thei lo a, Kevin de Bruyne erawhin bul a ṭan thei thung. Pep-a hote hi rinkai ni zawk mah se goal hmaah an hriam bik lo a, Chelsea tlarhnung tan hna an siam tam lo.

Bench aṭanga Jeremy Doku luh hnuah an goal bawh a na hret a, minute 84-naah goal an sual chhuak bawk. Vei lam aṭanga De Bruyne cross chu Chelsea keeper Dorde Petrovic-a'n nam perin Bernardo Silva zawnah chiah a tla a, Portuguese midfielder hian a hun ṭha neih hi a hlah lo.

Pep-a hoten ṭum dang an pha lo a, first half-ah goal zawnah an pet lo. Mahse, minute 90 an khelh zawh meuh chuan a chak zawkah an ṭang.

Man City-in FA Cup final an lut a, double champion thei an la ni. Pep-a hote hian final-ah nizana Manchester United leh Coventry City inkhela chak zawk an hmachhawn ang.